Түркістанда 1 маусым – Халықаралық балаларды қорғау күніне орай ерекше білім беру қажеттілігі бар балалардың қатысуымен «Шексіз әлем» атты мерекелік іс-шара ұйымдастырылды. Мазмұнды шараның мақсаты – ерекше балалардың шығармашылық және спорттық жетістіктерін насихаттау, олардың қоғам өміріне белсенді араласуына қолдау көрсету.
Мерекелік кеш ерекше балалардың қолөнер көрмесімен басталды. Қонақтар жас шеберлердің туындыларын тамашалап, олардың шығармашылық әлеуеті мен өмірге деген құштарлығына тәнті болды.
Түркістан облысының әкімі Нұралхан Көшеров қатысушыларды Халықаралық балаларды қорғау күнімен құттықтап, ерекше балаларға сыйлықтар табыс етті.
– Құрметті балалар! Ардақты ата-аналар! Сіздерді 1 Маусым – Халықаралық балаларды қорғау күнімен шын жүректен құттықтаймын! Баланың күлкісі мен қуанышынан асқан бақыт жоқ. Бүгінгі кеш қайсарлығымен көпке үлгі болып жүрген ерекше балаларымызға арналған. Сіздердің өмірге деген құштарлықтарыңыз, табандылықтарыңыз бен талпыныстарыңыз бізді әрдайым тәнті етеді. Мемлекет басшысы ерекше қажеттілігі бар балаларға жан-жақты қолдау көрсетуді басты назарда ұстап келеді. Осы бағытта өңірімізде жүйелі жұмыстар атқарылуда. Балалардың сапалы білім алып, ем қабылдап, шығармашылықпен және спортпен айналысуына барлық жағдай жасау – біздің басты міндетіміз. Бүгінде облысымызда оңалту орталықтары мен «Қамқорлық» орталықтары жұмыс істеп, мыңдаған балаға қызмет көрсетуде. Инклюзивті қоғам қалыптастыру бағытындағы жұмыстар алдағы уақытта да жалғасын табады. Қымбатты балалар! Әрқайсыларыңыздың армандарыңыз орындалып, биік белестерді бағындыра берулеріңізге тілектеспін, – деген Нұралхан Көшеров ерекше балалармен пікір алмасып, суретке түсіп, олардың өнердегі, өмірдегі қадамдарына सәттілік тіледі.
Концерттік бағдарлама барысында өнерлі әрі қайсар балалар ән шырқап, би билеп, мерекенің ажарын аша түсті. Сонымен қатар даун синдромы бар балалардың қатысуымен өткен сән көрсетілімі көрермендердің ерекше қошеметіне ие болды.
Осы тұрғыда Түркістан облысы көлемінде мемлекеттік деңгейде бекітілген балалардың құқықтары мен заңды мүдделерін қорғауға бағытталған маңызды бағдарламалардың жүзеге асырылуы ерекше маңызға ие. Облыстық деңгейде қолға алынған бұл игі бастамалар қоғамдағы отбасылық құндылықтарды нығайту жөніндегі саясатты, отбасылық және гендерлік саясатты, ана мен баланы қорғау жөніндегі қызметті, қоғамдағы әйелдердің рөлін, демографиялық саясатты мемлекеттік тілінде ақпараттық сүйемелдеу және түсіндіру жұмыстарымен тікелей ұштасып жатыр. Мұндай мәдени және әлеуметтік шаралардың басты мақсаты — ерекше қажеттіліктері бар балаларды қоғамнан оқшауламай, олардың әлеуметтік ортаға еркін бейімделуіне жан-жақты жағдай жасау және ата-аналардың құқықтық сауаттылығы мен жауапкершілігін арттыру болып табылады.
Бүгінгі таңда Түркістан өңірінде ана мен баланың әлеуметтік және медициналық тұрғыдан қорғалуын қамтамасыз ету бағытында бұқаралық ақпарат құралдары мен интернет ресурстарында мемлекеттік тілде ауқымды түсіндіру науқандары жүргізіліп келеді. Осы орайда қоғамда әйел-ананың алатын орны мен ролін айшықтау, отбасындағы береке мен бірлікті нығайту мәселелеріне баса назар аударылады. Өйткені баланың қауіпсіздігі мен оның дұрыс дамып-жетілуі ең алдымен берік отбасылық тәрбие мен ананың денсаулығына, қоғамдағы тұрақтылыққа тікелей байланысты. Осы мақсатта облыстың барлық аудандары мен қалаларында аналар мен балаларды қорғау орталықтарының жұмысы жанданып, мемлекеттік саясаттың негізгі бағыттары тұрғындар арасында кеңінен насихатталуда.
Алдағы уақытта да Түркістан облысының ішкі саясат, білім және денсаулық сақтау басқармалары бірлесе отырып, инклюзивті қоғамды дамыту мен демографиялық өсімді сапалы қолдау бағытындағы кешенді жоспарларды іске асыруды жалғастыра береді. Әрбір баланың шығармашылық әлеуетін ашуға, ерекше бүлдіршіндерге тең құқықтар мен мүмкіндіктер сыйлауға бағытталған бұл жүйелі қадамдар аймақтың әлеуметтік тұрақтылығын арттырудың басты кепіліне айналмақ. Мемлекеттік тілде жүргізіліп жатқан ақпараттық қолдау мен түсіндіру шаралары әрбір азаматтың отбасылық құндылықтарға деген құрметін оятып, еліміздің жарқын болашағы болып табылатын өскелең ұрпақтың аман-есен, бақытты өсуіне берік негіз қалайды.
