Жастар – ел болашағының стратегиялық ресурсы. Мемлекет тарапынан жастарды қолдау, олардың әлеуметтік-экономикалық белсенділігін арттыру бағытында жүйелі жұмыстар жүргізіліп келеді. Соның бірі ретінде NEET (Not in Education, Employment or Training) санатына жататын жастарды анықтау және қолдау мақсатында үй аралау жұмыстары ұйымдастырылды.
Мақсат – жастардың жұмыссыздық деңгейін төмендету және білім алуына мүмкіндік жасау:
Аталған шара 15-29 жас аралығындағы жұмыс істемейтін, оқымайтын және кәсіби оқуға қатыспайтын жастарды анықтауға бағытталды. Бұл – әлеуметтік тұрғыдан осал топқа жататын, қоғам өмірінен шет қалып қою қаупі жоғары жастарды уақытылы анықтап, оларға нақты қолдау көрсету үшін қолға алынған маңызды жұмыс.
Қала аумағындағы үйлер араланды:
Арнайы құрылған жұмыс тобы өңірдегі ауыл-аймақтарды, қала аумағындағы тұрғын үйлерді таңдаулы әдіспен аралап, NEET санатына кіретін жастармен жеке кездесулер өткізді. Әрбір кездесуде жастардың әлеуметтік жағдайы, білімі, жұмыс тәжірибесі және болашаққа қатысты жоспары сарапқа алынды.
Мемлекеттік бағдарламалар туралы кең көлемде ақпарат берілді:
Үй аралау барысында үгіт-насихат жұмыстары да қатар жүргізілді. Жастарға жұмысқа орналасу, кәсіби оқудан өту, қайтарымсыз мемлекеттік гранттар алу, кәсіп ашуға арналған бағдарламалар туралы кең көлемді ақпарат ұсынылды. Атап айтқанда:
— “Жастар тәжірибесі”, “Бастау Бизнес”, “Алғашқы жұмыс орны”;
— Қайтарымсыз гранттар мен жеңілдетілген несиелер туралы;
— Техникалық және кәсіптік білім беру курстарына тегін қатысу мүмкіндіктері түсіндірілді.
Сондай-ақ, жастарға Жастар ресурстық орталығы, халықты жұмыспен қамту орталығы, кәсіпкерлік палатасы сынды мекемелердің қызметі мен байланыс арналары көрсетілді.
Қоғам өміріне белсенді тарту – басты міндет:
Шараның басты нәтижесі – NEET санатындағы жастардың өз мүмкіндіктері туралы нақты ақпарат алып, әлеуметтік өмірге араласуға деген қызығушылығының артуы. Көптеген жас азаматтар кәсіби оқуға немесе бос жұмыс орындарына жолдама алу бойынша кеңес алды.
Бұл бастама – тек статистикалық есеп үшін емес, нақты әлеуметтік қолдауға зәру жастармен бетпе-бет кездесіп, оларға шынайы көмек көрсетуге бағытталған. NEET жастарының санын азайту – жастар арасындағы жұмыссыздық пен әлеуметтік оқшаулануды төмендетіп, елдің адами капиталын дамытуға ықпал етеді.
Мақсат – ешбір жасты назардан тыс қалдырмау.
Болашағымыздың иелеріне жол ашу – бәріміздің ортақ міндетіміз.
