Жетісай аудандық полиция бөлімінің бастығының бірінші орынбасары полиция майоры Марат Кадыркуловтың қатысуымен Асық ата кентінің учаскелік полиция инспекторлары полиция подполковнигі М. Халықов, полиция майоры Қ. Жұмабаев, полиция майоры А. Турегельдиев, полиция майоры М. Бердибеков, полиция майоры А. Алибеков, полиция лейтенанты М. Жаныс 2023 жылдың 6 айында орын алған қылмыс пен құқық бұзушылықтың алдын алу, қоғамдық қауіпсіздікті қамтамасыз ету мақсатында жүргізілген жұмыстар мен профилактикалық іс-шаралардың есебін берді.
Жиын барысында, алғашқы кезекте, жиылған қауым полицияның учаскелік инспекторларының есепті хабарламаларына ықыласпен құлақ түрді. Өз кезегінде тұрғындар тарапынан әлеуметтік маңызы бар, көкейкесті сипаттағы біршама өзекті мәселелер ортаға салынып, оларды оңтайлы шешудің тиімді жолдары қарастырылды. Сауалдар тізбегінен қала жұртшылығын ересек адамдар үшін демалыс орталықтарының ұйымдастырылуы, көшеде қайыр сұрап жүретін тіленшілерге тосқауыл қойылуы, иесіз иттер мен мысықтар санының көбейіп кетуі, түн мерзімінде спиртті ішімдіктердің сатылуы, нашақорлардың парықсыз әрекеттері секілді жайттар алаңдататыны аңғарылды. Тұрғындар тарапынан туындаған сауалдарға полиция бөлімінің басшылық құрамы мен тиісті құзырлы органдардың өкілдері жауап қайтарып, алдағы кезеңде қолға алынатын істер хақында мәлімдеме жасады.