Жас ұрпақтың саналы, тәрбиелі әрі қоғамға жауапты азамат болып қалыптасуы – отбасы құндылықтары мен рухани тәрбиенің өзара байланысынан бастау алады. Бүгінде мемлекет тарапынан жастардың құқықтық мәдениетін арттыру, олардың қауіпсіздігін қамтамасыз ету және отбасылық құндылықтарды нығайту бағытында жүйелі жұмыстар атқарылып келеді. Себебі берік отбасы – тәрбиелі ұрпақтың, ал тәрбиелі ұрпақ – тұрақты қоғамның негізі.
Осы бағытта Түркістан облысының білім басқармасы Қазақстан Республикасы Оқу-ағарту министрлігінің 2026 жылғы 15 мамырдағы №05-1-05-4/3428-И хатына сәйкес арнайы іс-шаралар ұйымдастыруда. Аталған тапсырма аясында жастар арасында құқық бұзушылықтың алдын алу және жауапты мінез-құлықты қалыптастыруға бағытталған деректі фильмдер топтамасы білім беру ұйымдары мен колледж студенттеріне көрсетілуде.
Бұл бастама Қазақстан Республикасы Президенті Әкімшілігі Басшысының тапсырмасына сәйкес жүзеге асырылып отыр. Ішкі істер министрлігі әзірлеген деректі фильмдер жастардың құқықтық сауаттылығын арттыруға, заң талаптарын сақтауға, қоғам алдындағы жауапкершілікті күшейтуге және теріс әрекеттердің алдын алуға бағытталған.
Осыған сәйкес Түлкібас агробизнес және саяхат колледжінің студенттеріне арнайы ұйымдастырылған көрсетілім өткізілді. Шара барысында жастарға аталған деректі фильмдер таныстырылып, қоғамдағы тәртіп, заңға бағыну мәдениеті және жауапты мінез-құлық қалыптастыру мәселелері кеңінен түсіндірілді.
Көрсетілім барысында студенттер құқық бұзушылықтың салдары, қоғамдағы тәртіптің маңызы және жеке жауапкершіліктің рөлі туралы маңызды ақпараттар алды. Сонымен қатар жастар арасында өз пікірін ашық айту, талдау жасау және өмірлік жағдайларға дұрыс баға беру дағдылары қалыптастырылды.
Мамандардың айтуынша, жастар тәрбиесінде отбасының рөлі ерекше. Себебі әрбір жасөспірімнің мінез-құлқы, өмірлік ұстанымы және қоғамға көзқарасы ең алдымен отбасындағы тәрбиеге байланысты қалыптасады. Ата-ананың үлгісі, қамқорлығы және бағыт-бағдары жас ұрпақтың болашақтағы өмір жолын айқындайды.
Сондықтан бүгінгі таңда жастармен қатар отбасы институтын нығайту мәселесі де ерекше назарда тұр. Жас отбасыларға қолдау көрсету, ата-ана мен бала арасындағы өзара түсіністікті арттыру және отбасылық құндылықтарды дәріптеу – қоғамдағы тұрақтылықтың негізгі кепілі.
Түлкібас ауданында бұл бағыттағы жұмыстар жүйелі түрде жүргізілуде. Ауданда білім беру ұйымдары, құқық қорғау органдары, жастар ресурстық орталығы және қоғамдық құрылымдар бірлесе отырып, жастардың тәрбиесіне бағытталған түрлі профилактикалық шараларды тұрақты ұйымдастыруда. Бұл жұмыстардың негізгі мақсаты – жастардың құқық бұзушылыққа бармауы, олардың дұрыс өмірлік бағыт таңдауы және қоғамға бейімделуі.
Сонымен қатар ауданда отбасылық құндылықтарды насихаттау, ұлттық тәрбиені дәріптеу және жас ұрпақтың рухани дамуына ықпал ету бағытында да кешенді жұмыстар жүргізілуде. Өйткені ұлттық тәрбие – отбасынан басталады, ал отбасы – мемлекеттің тірегі.
Бүгінде қоғамда жастардың әлеуметтік мәселелерін шешу, олардың бос уақытын тиімді ұйымдастыру және заңға бағынатын саналы азамат ретінде қалыптастыру – мемлекеттік саясаттың маңызды бағыттарының бірі болып отыр. Осы тұрғыда өткізілген деректі фильмдер көрсетілімі де жастардың ой-санасына оң әсер етіп, олардың өмірлік көзқарасын қалыптастыруға ықпал етті.
Түлкібас ауданында алдағы уақытта да жастар тәрбиесі мен отбасы құндылықтарын нығайтуға бағытталған жұмыстар жалғасын табады. Себебі тәрбиелі, білімді әрі жауапкершілігі жоғары жастар – ел болашағының сенімді тірегі.