Қоғамның тұрақтылығы мен ел болашағы ең алдымен отбасындағы тәрбиеге байланысты. Себебі әрбір жастың өмірге деген көзқарасы, қоғамдағы орны, еңбекке деген ынтасы мен азаматтық ұстанымы жанұядағы тәрбиеден бастау алады. Сондықтан бүгінгі таңда жастар мәселесімен қатар отбасы институтын нығайту, ата-ана мен бала арасындағы байланысты күшейту, жас буынға дұрыс бағыт-бағдар беру мемлекеттік саясаттың маңызды бағыттарының біріне айналып отыр.
Осы бағытта Түркістан облысының Түлкібас ауданында жастарды қолдау, олардың әлеуметтік жағдайын жақсарту және отбасылық құндылықтарды дәріптеу мақсатында жүйелі жұмыстар атқарылуда. Әсіресе NEET санатындағы жастармен жүргізіліп жатқан жұмыстардың әлеуметтік маңызы зор. Себебі мұндай жастармен дер кезінде байланыс орнату – олардың қоғамнан шет қалмауына, болашаққа сеніммен қарауына және өмірден өз орнын табуына мүмкіндік береді.
Аталған бағыттағы жұмыстар аясында Түлкібас ауданы ішкі саясат бөлімінің “Жастар ресурстық орталығы” коммуналдық мемлекеттік мекемесінің мамандары Жабағылы ауылдық округінде NEET санатындағы жастарды анықтау және оларды қолдау мақсатында арнайы түсіндірме жұмыстарын жүргізді.
Шара барысында мамандар жастардың тұрмыстық жағдайымен танысып, олардың отбасыларымен жеке кездесулер өткізді. Әсіресе ата-аналармен сұхбаттасуға ерекше көңіл бөлінді. Себебі баланың болашағына бейжай қарамай, оған қолдау көрсету – әрбір ата-ананың басты міндеті. Кездесу барысында ата-аналарға жастардың психологиялық жағдайына назар аудару, оларды еңбекке баулу, қоғамнан оқшауланып қалуына жол бермеу және дұрыс бағыт көрсету мәселелері түсіндірілді.
Мамандардың айтуынша, қазіргі таңда кейбір жастардың жұмыссыз жүруі немесе белсенді өмірден алшақтауы көбіне әлеуметтік қолдаудың жеткіліксіздігінен, өмірлік бағыттың айқын болмауынан және отбасы тарапынан қажетті қолдаудың аздығынан туындайды. Сондықтан мұндай жағдайда отбасының рөлі ерекше маңызды. Ата-ананың қамқорлығы мен қолдауы жастардың өмірге деген сенімін нығайтып, олардың болашаққа нақты мақсат қоюына ықпал етеді.
Кездесу барысында жастарға тұрақты жұмысқа орналасу, кәсіптік және қысқа мерзімді оқулардан өту, мемлекеттік қайтарымсыз гранттар алу және кәсіп бастау мүмкіндіктері туралы жан-жақты ақпарат берілді. Сонымен қатар жастарға мемлекет тарапынан жасалып жатқан қолдау шаралары түсіндіріліп, олардың өз қабілетін дамытуына мүмкіндік мол екені айтылды.
Бүгінде Түлкібас ауданында жастарды жұмыспен қамту мен әлеуметтік қолдауға бағытталған жұмыстар тұрақты түрде жүзеге асырылып келеді. Аудан көлемінде бос жұмыс орындары жәрмеңкелері, кәсіптік бағдар беру кездесулері, психологиялық қолдау шаралары, мотивациялық тренингтер және жастармен жеке кездесулер ұйымдастырылуда. Бұл жұмыстар жастардың қоғам өміріне белсенді араласуына және әлеуметтік бейімделуіне оң әсер етуде.
Сонымен қатар ауданда отбасы институтын нығайту мәселесіне де ерекше көңіл бөлінуде. Өйткені тәрбиелі, саналы әрі еңбекқор ұрпақ қалыптастыруда отбасының орны ерекше. Қазақ халқы ежелден “Ұяда не көрсең, ұшқанда соны ілесің” деп отбасы тәрбиесіне үлкен мән берген. Осы ұлттық құндылықтарды жастардың бойына сіңіру – бүгінгі күннің маңызды міндеттерінің бірі.
Жастар ресурстық орталығының мамандары ата-аналармен кездесуде отбасындағы сыйластық, өзара түсіністік және бала тәрбиесіндегі жауапкершілік мәселелерін де кеңінен қозғады. Әсіресе жастарға моральдық қолдау көрсету, олардың пікірімен санасу және қиын жағдайда жанынан табылу отбасы тұрақтылығының маңызды бөлігі екені айтылды.
Мұндай кездесулер жастар мен ата-аналар арасындағы байланысты нығайтып қана қоймай, қоғамдағы отбасылық құндылықтардың маңызын арттыруға ықпал етеді. Себебі берік отбасы – тұрақты қоғамның негізі. Ал қоғамға бейімделген, білімді әрі еңбекқор жастар – ел болашағының кепілі.
Түлкібас ауданында алдағы уақытта да жастарды қолдау және отбасы құндылықтарын нығайту бағытындағы жұмыстар жалғасын табады. Өйткені жастарға дұрыс бағыт беру, ата-ана мен бала арасындағы байланысты күшейту және отбасындағы тәрбиені нығайту – қоғамның рухани және әлеуметтік дамуының маңызды тетіктерінің бірі болып қала береді.