ҚМДБ-ның Шымкент қаласы бойынша өкіл имамы Бақдәулет Әбдрахманов Құрбан айт мерекесіне орай баспасөз брифингін өткізді. Қаланың бас имамы Құрбан айт намазы шаһардағы барлық мешіттерде 28 маусым күні таңғы сағат 6:30-да оқылатынын мәлімдеді. Биыл елімізде құрбан шалу рәсімі оффлайн және онлайн форматта өтеді. Қала тұрғындарына қолайлы жағдай жасау мақсатында qurban2023.kz сайты іске қосылған. – «Құрбан» сөзі «жақындау» деген мағынаны береді. Исламда әрбір балиғатқа жеткен, сапарда болмаған және дүние-мүлкі нисап мөлшеріне жеткілікті мұсылманға құрбандық шалу уәжіп. Құрбан айттың негізгі мәні — мұсылмандар арасында өзара мейірімділік, жомарттық, қайырымдылық, қанағат сынды адамгершілік құндылықтарды қалыптастыру. Осы ретте кәсіпкер азаматтарды мейрам қарсаңында мал құнын қолдан көтермей, халықтың әлеуметтік жағдайын ескеріп, оңтайлы баға ұсынуға шақырамын. Мейірімділік пен бірлікке үндейтін мерекеде барынша жақсылық жасауға тырысайық, — деді бас имам.
Қала тұрғындарына Бозарық елді мекенінде санитарлық талаптарға сай арнайы мал сою орны белгіленген. Тұрғындар құрбандық шалу рәсімін арнайы орында атқару қажет. Құрбандық малға түйе, қой-ешкі және мүйізді ірі қара ғана жарайды. Құрбандық шалудың белгілі уақыты бар. Құрбандықты одан алдын немесе кейін шалуға болмайды. Уақытынан бұрын шалған құрбандық өз отбасы үшін сойылған мал іспетті. Ол құрбандық болып есептелмейді. Ал уақытынан кейін шалса, оның етін садақа ету уәжіп болады, одан өзі жемейді.
Құрбан шалудың уақыты Құрбан айттың бірінші күні айт намазынан кейін басталып, айттың үшінші күні күн батқанға дейін жалғасады. Құрбан айт намазынан кейін барлық мұсылман ағайын-туыстарға, дос-жарандары мен көрші-қолаңға «Айт қабыл болсын!» айтып, айтшылайды.
Сонымен қатар, мерекеге орай Орталық Ақ мешітте “Айт Думан” іс-шарасын өткізу жоспарланып отыр.
