Қоғамдық тәртіпті қамтамасыз ету, кәмелетке толмаған жасөспірімдер арасындағы қылмыс пен құқықбұзушылықтың алдын алу, сондай-ақ жастардың қауіпсіздігін арттыру — мемлекеттік жастар саясатының басты басымдықтарының бірі. Осы бағытта Түркістан қаласында жасөспірімдердің түнгі уақытта ата-анасының немесе заңды өкілдерінің еріп жүруінсіз үйден тыс жерлерде жүру деректерін болдырмау және жолын кесу мақсатында кезекті түнгі рейдтік іс-шара ұйымдастырылды.
Аталған профилактикалық шараға Түркістан қалалық Жастар ресурстық орталығының мамандары, қалалық полиция басқармасының жергілікті полиция қызметінің инспекторлары, жергілікті белсенді жастар мен БАҚ өкілдері қатысты. Рейдтік топ шаһар аумағындағы қоғамдық орындарды, ойын-сауық орталықтарын, компьютерлік және компьютерлік-ойын клубтарын, кафе-барлар мен саябақтарды жіті бақылауға алды.
Арнайы профилактикалық рейд барысында заңнама талаптарына сәйкес сағат 22:00-ден кейін ойын-сауық мекемелерінде, сондай-ақ сағат 23:00-ден кейін тұрғын үйлерден тыс жерлерде заңды өкілдерінсіз жүрген кәмелетке толмаған жасөспірімдер анықталып, тиісті түсіндірме жұмыстары жүргізілді. Заң бұзушылықтар орын алған жағдайда кәмелетке толмағандардың ата-аналары шақыртылып, оларға Қазақстан Республикасының Әкімшілік құқық бұзушылық туралы кодексінің баптары бойынша түсіндірме берілді және жауапкершіліктері ескертілді.
Сондай-ақ, рейдтік топ өкілдері кәсіпкерлік субъектілерінің иелері мен мекеме әкімшілеріне түнгі уақытта кәмелетке толмағандарды кіргізуге болмайтындығын, бұл талаптар бұзылған жағдайда заңнамалық шеңберде әкімшілік айыппұлдар қарастырылғанын ескертті. Мекеме басшыларына арнайы ескертпе-жадынамалар таратылып, қауіпсіздік шараларын қатаң сақтау қажеттілігі жүктелді.
Кездескен жасөспірімдермен жеке-жеке сұхбат жүргізіліп, оларға құқықтық сауаттылықты арттырудың, зиянды әдеттерден аулақ болудың, жат ағымдар мен қылмыстық ортаның арбауына түсіп қалмаудың маңызы жан-жақты түсіндірілді. Мамандар жастардың түнгі уақытта көшеде немесе ойын залында емес, үйде білім алып, демалуы тиістігін, ал бос уақытты күндізгі мезгілде үйірмелер мен спорт секцияларына арнаған абзал екендігін баса айтты.
Қоғамдағы тәртіп пен қауіпсіздікті сақтау – бұл тек құқық қорғау органдарының емес, бүкіл қоғамның, соның ішінде әрбір ата-ананың ортақ міндеті. Баланың жүрген ортасын, досын, бос уақытын қадағалау — әрбір ата-ананың басты азаматтық әрі перзенттік парзы. Заңды құрметтеп, құқықтық мәдениетті қалыптастыру – қауіпсіз шаһар мен жарқын болашақтың берік кепілі.
Түркістан қалалық Жастар ресурстық орталығы өкілдерінің хабарлауынша, жастар арасындағы қылмыстың алдын алу, жасөспірімдердің қауіпсіздігін қамтамасыз ету бағытындағы мұндай түнгі рейдтік іс-шаралар мен ақпараттық-түсіндіру жұмыстары алдағы уақытта да жүйелі түрде, апта сайын тұрақты ұйымдастырылатын болады. Шаһардағы қоғамдық тыныштық пен жастардың қауіпсіздігі басты бақылауда қала береді.