Кез келген мемлекеттің беріктігі мен қоғамның рухани саулығы ең алдымен отбасы институтының деңгейімен өлшенеді. Шаңырақтағы сыйластық, өзара түсіністік пен мейірімділік – өскелең ұрпақтың толыққанды азамат болып қалыптасуының негізгі діңгегі. Осы орайда, балалар мен жастар арасында отбасылық құндылықтарды кеңінен дәріптеу, оларды психологиялық тұрғыдан қауіпсіз әрі қолайлы ортада тәрбиелеу және жағымсыз әлеуметтік құбылыстардың алдын алу – мемлекеттік жастар саясатының басты басымдықтарының бірі болып қала береді.
Осы маңызды міндеттерді жүзеге асыру мақсатында Түркістан қаласы әкімдігі Ішкі саясат бөлімінің «Жастар ресурстық орталығы» КММ-нің ұйымдастыруымен «Балауса» жазғы сауықтыру лагерінде демалып жатқан балалар арасында «Менің идеалды отбасым» тақырыбында шығармашылық эссе байқауы өткізілді. Жазғы демалыс уақытын мазмұнды әрі танымды етіп ұйымдастыруға бағытталған бұл іс-шара өскелең ұрпақтың ішкі дүниесін, арман-тілектері мен отбасы туралы пайымдарын ашуға мүмкіндік беретін бірегей майданға айналды.
Аталған байқаудың басты мақсаты – қоғамда отбасының мәртебесін арттыру, балалардың бойында ата-анаға, бауырларға деген сүйіспеншілікті қалыптастыру ғана емес. Бұған қоса, соңғы уақытта қоғамда жиі талқыланып жүрген отбасылық зорлық-зомбылықтың, мектеп пен әлеуметтік желілердегі буллинг пен кибербуллингтің алдын алу, сондай-ақ балалардың өз құқықтары мен қауіпсіздік мәдениетін қалыптастыру болып табылады. Зорлық-зомбылықсыз қоғам құру идеясы ең алдымен баланың санасына отбасы арқылы сіңуі тиіс.
Шығармашылық сайысқа лагерьде демалып жатқан түрлі жастағы балалар белсене қатысты. Бас қосу барысында қатысушылар өздерінің идеалды отбасы туралы көзқарастарын, сүйіспеншілікке толы естеліктері мен болашаққа деген армандарын қағаз бетіне түсірді. Жас авторлар өз эсселерінде отбасы мүшелері арасындағы шынайы сыйластық, қамқорлық, қиын-қыстау сәттегі демеу мен бір-бірін тыңдай білудің каншалықты маңызды екенін жан-жақты сипаттап берді.
Маңыздысы, балалар өз жұмыстарында тек қуанышты сәттерді жазып қана қоймай, кез келген зорлық-зомбылықтың, қорлау мен буллингтің қоғамға тигізер кері әсері туралы терең ой қозғады. Олар әрбір баланың зорлық-зомбылықтан азат, жылы әрі қауіпсіз шаңырақта өсуге құқылы екенін атап өтіп, достық пен татулықтың өмірдегі орнына ерекше тоқталды. Жас дарындардың мұндай ересектерше ой толғауы, әлеуметтік мәселелерге бей-жай қарамауы қазылар алқасы мен ұйымдастырушыларды тәнті етті.
«Жастар ресурстық орталығының» өкілдері мұндай іс-шаралардың жас ұрпақтың психологиялық саулығын сақтауда, олардың бойында азаматтық жауапкершілікті қалыптастыруда рөлі зор екенін атап өтті. Буллингке немесе отбасындағы түсініспеушілікке тап болған баланың өз ойын жазбаша жеткізуі – бұл оның ішкі буырқанысын сыртқа шығаруға, онымен жұмыс істеуге берілген мүмкіндік.
Байқау қорытындысы бойынша ерекше ой ұшқырлығымен, мазмұндылығымен және эмоционалды тереңдігімен көзге түскен үздік эссе авторлары анықталды. Белсенді қатысушылар мен жеңімпаздарға ұйымдастырушылар тарапынан арнайы дипломдар, алғыс хаттар мен естелік сыйлықтар табысталды. Шара соңында ұйымдастырушылар балаларға ізгі тілектерін білдіріп, олардың әрқашан ашық аспан астында, мейірімге толы отбасында бақытты балалық шақ кешулеріне тилектестік білдірді.
Түркістан қаласында өскелең ұрпақтың тәрбиесі мен қауіпсіздігіне бағытталған мұндай кешенді іс-шаралар алдағы уақытта да жүйелі түрде жалғасын табады. Балалардың шығармашылық әлеуетін ашу арқылы отбасылық құндылықтарды нығайту – ертеңгі салауатты әрі тұрақты қоғамның берік іргетасын қалау болып табылады.