Мемлекетіміздің ішкі саясаты мен әлеуметтік даму стратегиясының ең негізгі өзегі — салауатты отбасы институтын қалыптастыру, ана мен баланы қорғау жүйесін жетілдіру және өскелең ұрпақтың сапалы білім мен саналы тәрбие алуына толық жағдай жасау болып табылады. Қазіргі таңда отбасылық-демографиялық саясатты дамыту және «Мерейлі отбасы» идеяларын қоғамда кеңінен насихаттау — ұлт саулығы мен ел қауіпсіздігінің кепілі. Үлгілі шаңырақтан шыққан, білім мен спортта оза шапқан дарынды жастар — Жаңа Қазақстанның интеллектуалды элитасы мен тірегіне айналмақ.
Осы орайда, еліміздің оңтүстік қақпасы саналатын, демографиялық өсімімен және берекелі де өнегелі отбасыларымен аты шыққан Түркістан облысының Келес ауданында ерекше қуанышты оқиға орын алуда. 2025–2026 оқу жылының қорытындысы бойынша аудан мектептерінде өзгеше түлектер алтын ұя мектеп қабырғасымен қоштасқалы жатыр. Биыл ауданның бірнеше іргелі білім ордаларында үшем және егіз оқушылар қатар түлеп ұшқалы отыр. Бұл — тек алтын құрсақты аналар мен әулеттердің ғана емес, тұтас Келес ауданының мерейін өсіріп, мәртебесін биіктеткен мақтанышты жаңалық болды.
Аудандық білім беру саласының биылғы ең үлкен жаңалығы — №18 С.Қожанов атындағы жалпы білім беретін мектептен бір күнде дүниеге келіп, мектепті де бірге тәмәмдаған үшем ағайындылардың түлеп ұшуы. Олар — Жанадил Нұрсұлтан Жанайұлы, Жанадил Нұрғали Жанайұлы және Жанадил Нұрлан Жанайұлы.
Бұл ағайынды үшемдер тек бір үйде туып, бір сыныпта оқып қана қойған жоқ, олар мектептің қоғамдық-мәдени және спорттық өмірінде де ерекше белсенділіктерімен көзге түсті. Ұстаздар қауымы мен сыныптастары арасында үлкен сыйластыққа ие болған түлектердің жетістіктері толағай. Олардың үшеуі де кішкентай күнінен футбол спортына ерекше қызығушылық танытып, аудандық және облыстық деңгейдегі турнирлерде өздері оқыған білім ордасының намысын абыроймен қорғап келді. Сонымен қатар, мектеп ішілік барлық патриоттық, тәрбиелік шаралардың бел ортасында жүріп, замандастарына үлгі бола білді. Ағайындылардың алға қойған мақсаттары айқын, Отанға қызмет ету жолындағы таңдаған мамандықтары бойынша жоғары оқу орындарына түсуге дайындықтары өте жоғары.
Келес ауданындағы тағы бір қуаныш ошағы — №64 жалпы орта мектебі. Бұл білім ордасы да биылғы оқу жылын ерекше мақтанышпен қорытындылап отыр. Аталған мектептің егіз түлектері — Мықтыбековтер әулетінің перзенттері бүгінде бүкіл ауданның мақтанышына айналды.
Мықтыбековтер әулеті — өңірдегі ағайын ынтымағы мен ұрпақ тәрбиесін ту еткен ең өнегелі отбасылардың бірі. Бұл шаңырақ өзінің берік құндылықтары мен қоғамдық белсенділігінің арқасында мемлекеттік деңгейде танылған. Атап айтқанда, отбасы 2019 жылы өткен республикалық «Мерейлі отбасы» ұлттық байқауының аудандық және облыстық кезеңдерінде жоғары деңгейде танылып, көпшілікке үлгі-өнеге ретінде ұсынылған болатын. Әулет мүшелері білім, ғылым және қоғамдық салаларда үнемі жоғары жетістіктерге жетіп келеді.
Ұяда не көрсе, ұшқанда соны ілетін егіз түлектердің де ғылым мен білімдегі бағындырған белестері назар аударуға тұрарлық. Мысалы, Мықтыбековтер отбасының мақтанышы Мықтыбек Асан 2026 жылы бас қаламыз Астанада өткен халықаралық деңгейдегі ауқымды жиын — ІІ Дүниежүзілік саммиттің белсенді қатысушысы атанды. Ал оның сыңары Мықтыбек Зәуре ғылыми-зерттеу бағытына бейімділігін көрсетіп, 2025 жылы өткен мектеп оқушыларының ғылыми жобалар байқауында физика пәні бойынша облыстық кезеңде жүлделі ІІІ орынды иеленді. Бұл жетістіктер бір отбасыдан шыққан егіздердің жан-жақты әрі дарынды болып өскендігінің нақты дәлелі.
Келес ауданының білім бөлімі мен жергілікті атқарушы органдары бұндай дарынды, тәрбиелі әрі мақсатшыл жастардың көптеп шығуы — аймақтағы отбасы тәрбиесі мен мектеп қабырғасындағы сапалы білім беру жүйесінің тығыз байланысының нәтижесі екенін атап өтуде. Егіздер мен үшемдердің бір мезгілде осындай жоғары нәтиже көрсетуі — өңір жастарының әлеуеті қаншалықты жоғары екенін аңғартады.
Мемлекет басшысы Қасым-Жомарт Тоқаев өскелең ұрпақтың білімі мен тәрбиесіне ерекше көңіл бөле отырып, қоғамда «Адал азамат» қалыптастыру идеясын үнемі алға тартады. Келес ауданындағы үшемдер мен егіз түлектердің бұл жетістігі — дәл осы мемлекеттік идеяның өмірдегі шынайы көрінісі. Олардың жетістігі жас ұрпаққа үлкен серпін беріп, мектеп оқушыларының білім мен ғылымға, спортқа деген құлшынысын арттыра түсері сөзсіз.
Түркістан облысы Келес ауданындағы бұл ерекше түлектердің үлкен өмірге қадам басуы — аймақтағы отбасылық құндылықтарды ұлықтау, ана мен баланы қорғауды мемлекеттік қолдаудың және жастар саясатын жүзеге асырудың ең жарқын әрі мазмұнды нәтижесі болып табылады. Қанаттары қатайып, ұядан ұшқалы тұрған жас қырандардың қадамдарына сәттілік тілейміз! Уығы мықты шаңырақтан шыққан білімді ұрпақ барда — еліміздің іргесі берік, болашағы жарқын болмақ.
