Шымкент қаласында жаяу жүргіншілердің қатысуымен болатын жол-көлік оқиғаларының алдын алу және жол қозғалысы ережелерін сақтау мәдениетін арттыру мақсатында кешенді профилактикалық іс-шара ұйымдастырылды. Бұл акцияны Шымкент қалалық Патрульдік полиция полкі мен «Жастар ресурстық орталығы» бірлесіп өткізді. Жедел-профилактикалық шара «Жаяу жүргінші» атауымен қала аумағында кең ауқымда жүргізілді.
Шара аясында полиция қызметкерлері мен ерікті жастар қала тұрғындарына жол қозғалысы ережелерінің маңыздылығын түсіндіріп, ақпараттық жадынамалар таратты. Бұл жадынамаларда жаяу жүргіншілерге арналған қозғалыс ережелері, белгіленбеген жерден өту кезінде туындайтын қауіптер, жүргізушілердің жаяу жүргіншілерге жол беру міндеттері және жаяу жүргіншілердің түнгі уақытта жарық шағылыстыратын элементтер тағуы керектігі жөнінде нақты мәліметтер көрсетілген.
Профилактикалық шара барысында жол қозғалысына қатысушылармен бетпе-бет сөйлесіп, оларға нақты мысалдар келтіріле отырып, жолдағы қауіпсіздікті қамтамасыз ету ережелері түсіндірілді. Сонымен қатар жастар ұйымының еріктілері әлеуметтік желілер арқылы да ақпараттық қолдау көрсетіп, акцияны көпшілікке кеңінен таратты.
Шара кезінде Патрульдік полиция полк командирінің міндетін уақытша атқарушы, полиция подполковнигі Аширбаев Тоқтарбек сөз алып, тұрғындарды жол ережелеріне жауапкершілікпен қарауға шақырды.
– Жол қозғалысы ережелерін сақтау – бұл тек жүргізушілерге ғана емес, жаяу жүргіншілерге де қойылатын ортақ талап. Әрбір азамат өз өмірі мен айналасындағы адамдардың қауіпсіздігі үшін заң талаптарын сақтауға міндетті. Біздің басты мақсатымыз – жол-көлік оқиғаларының алдын алу арқылы адамдардың өмірін сақтау. Мұндай түсіндіру шаралары алдағы уақытта да тұрақты түрде ұйымдастырылатын болады, – деп атап өтті подполковник Тоқтарбек Аширбаев.
Қазіргі уақытта жолдағы тәртіп пен қауіпсіздік мәселесі – қоғам үшін аса маңызды. Жыл сайын республика көлемінде мыңдаған жол-көлік оқиғалары тіркеліп, өкінішке орай, олардың бірқатары қайғылы жағдаймен аяқталып жатады. Жаяу жүргіншілердің жол ережелерін елемеуі немесе жолды белгіленбеген жерден кесіп өтуі жиі қайғылы оқиғаларға себеп болуда. Сондықтан мұндай түсіндіру жұмыстары тек бір реттік шаралармен шектелмей, жүйелі түрде жалғасын табуы тиіс.
Айта кету керек, полиция мен қоғамның өзара іс-қимылы – жолдағы қауіпсіздікті қамтамасыз етудің маңызды құралы. Қоғамдық ұйымдардың, жастар ресурстық орталықтарының және еріктілердің белсенділігі бұл бағыттағы жұмыстардың тиімділігін арттыруға мүмкіндік береді. Қала тұрғындары өз кезегінде жол қозғалысына байыппен қарап, қауіпсіздікке немқұрайлы қарамауы қажет.
Осындай ортақ күш-жігер арқылы ғана жол-көлік оқиғаларының санын азайтып, қауіпсіз орта қалыптастыруға болады. Жол — ортақ кеңістік, онда әрбір қатысушының тәртіп пен заңға бағынуы басты шарт екенін әрбір азамат жадында ұстауға тиіс.