ТҮРКІСТАН ҚАЛАСЫНДА ЖОЛ ЖӨНДЕУ ЖҰМЫСТАРЫ ҚАРҚЫНДЫ ЖҮРІП ЖАТЫР

Түркістан қаласының дамуы тек жаңа ғимараттар мен әлеуметтік нысандардың бой көтеруімен шектелмейді. Қала тіршілігінің негізгі күретамыры саналатын жол инфрақұрылымын дамыту – аймақ басшылығының басты назарындағы мәселе. Осыған орай Түркістан облысының әкімі Нұралхан Көшеров облыс орталығында жүргізіліп жатқан жол жөндеу және реконструкциялау жұмыстарымен арнайы барып танысты.
ҚАЗЫБЕК БИ МЕН ЖАРЫЛҚАПОВ КӨШЕСІНДЕГІ ЖОЛ ҚҰРЫЛЫСЫ:
Сапар барысында аймақ басшысы ең алдымен Қазыбек би және О.Жарылқапов көшелері аралығында салынып жатқан жаңа жол құрылысын көрді. Жолдың жалпы ұзындығы 2,5 шақырым, төрт жолақты етіп жоспарланған. Бұл учаскеде көлік ағыны жоғары болғандықтан, жаңа жолдың салынуы қаладағы көлік қозғалысын айтарлықтай жеңілдетпек.
Жоба аясында тек жол төсеу емес, аяқжолдар, су ағатын арықтар, жол белгілері, сондай-ақ көшені жарықтандыру инфрақұрылымы да қамтылған. Мердігер компания өкілдерінің айтуынша, егер қаржыландыру толық қамтамасыз етілсе, құрылыс жұмыстары биылғы жылдың соңына дейін аяқталады.
ТӘУКЕХАН КӨШЕСІ – ЖАЯУ ЖҮРГІНШІЛЕР ҮШІН ҚОЛАЙЛЫЛЫҚ:
Келесі нысан – Тәукехан көшесі. Мұнда ұсақ түйіршікті асфальт төселіп, жаяу жүргіншілерге арналған аяқжолдар салынуда. Бұл көше – қала орталығындағы маңызды артериялардың бірі, сондықтан оның жаңғыртылуы жаяу жүргіншілер мен көлік жүргізушілер үшін де айтарлықтай тиімді болмақ. Облыс әкімі жұмыс қарқынына оң баға беріп, сапа мәселесіне ерекше мән беру қажеттігін атап өтті.
Б.ҚАЛАБИ КӨШЕСІНІҢ РЕКОНСТРУКЦИЯСЫ – АУҚЫМДЫ ЖОБА:
Облыс әкімі Б.Қалаби көшесінің де құрылыс алаңына барып, ондағы реконструкциялау жұмыстарымен танысты. Ұзындығы 7,4 шақырым болатын бұл көше төрт жолақты етіп қайта салынады. Жобаның тапсырыс берушісі – Түркістан қаласының әкімдігі. Қазіргі таңда бұл жобаның аясында 3 463 412,3 мың теңге игерілген. Жобаны 2024-2026 жылдары кезең-кезеңімен жүзеге асыру жоспарланған. Толық қаржыландыру қолға алынса, жол толығымен жаңарып, «Бекзат» шағынауданы тұрғындары үшін қатынас әлдеқайда жеңілдейді. Сонымен қатар, қаланың басқа көшелеріндегі жол жүктемесі азаяды, көлік қозғалысы біркелкі реттеледі.
ЖОЛ САПАСЫ – БАСТЫ НАЗАРДА:
Жұмыс сапары барысында облыс әкімі Нұралхан Көшеров қала әкімі мен жауапты салалық басқарма басшыларынан есеп алып, нақты тапсырмалар жүктеді. Ол атқарылып жатқан жұмыстардың сапасына жіті назар аударылуы тиіс екенін атап өтіп, құрылыс сапасына, материалдардың беріктігіне, жаяу жүргіншілер қауіпсіздігіне ерекше мән беруді міндеттеді.
«Біз кез келген жобаны тек уақытылы тапсыруды ғана емес, оның ұзақмерзімділігі мен сапасын да қамтамасыз етуіміз керек. Түркістан – еліміздің рухани астанасы. Сондықтан әрбір көшесі де, ғимараты да елге үлгі болуға тиіс», – деді облыс әкімі.
ЖОЛ ЖӨНДЕУ ЖҰМЫСТАРЫ ҚАРҚЫН АЛҒАН:
Айта кетейік, 2024 жылы Түркістан қаласы бойынша ұзындығы 138,5 шақырымды құрайтын 159 көшеге орташа жөндеу жұмыстары жүргізу жоспарланған. Бұл – соңғы жылдардағы ең ауқымды көрсеткіштердің бірі. Бүгінгі таңда осы бағытта белсенді құрылыс және жөндеу жұмыстары басталып кеткен.
Көшелерге асфальт төсеу, жол жиектерін орнату, аяқжолдар салу, жол қозғалысын реттеу белгілерін жаңарту, жарықтандыру жүйесін жетілдіру секілді жұмыстар толық қамтылуда. Бұл – тек көлік жүргізушілері үшін ғана емес, қала тұрғындарының қауіпсіздігі мен жайлылығы үшін де маңызды бастама.
Жол – ел дамуының күретамыры. Түркістан қаласында жүргізіліп жатқан кешенді құрылыс пен жөндеу жұмыстары – тұрғындарға қолайлы инфрақұрылым қалыптастыруға бағытталған. Облыс әкімінің бұл сапары өңірдегі жол құрылысын жүйелі бақылауда ұстап, сапалы әрі уақытылы орындалуын қамтамасыз етуге мүмкіндік бермек.
Алдағы жылдары Түркістан қаласы тек тарихи орда ғана емес, заманауи жол жүйесімен жабдықталған жайлы қала ретінде де танылатынына сенім мол.