Бүгін Түркістан қаласының әкімі Әзімбек Пазылбекұлы кезекті көшпелі кездесу аясында Шауғар секторының тұрғындарымен кездесті.
Кездесу барысында қала басшысы 2024 жылы тұрғындар тарапынан көтерілген мәселелердің орындалу барысы және сектор аумағында атқарылып жатқан жұмыстар жайында баяндады. Қала әкімі тұрғындарға алдағы кезеңге жоспарланған жобаларды таныстырып, әрбір тұрғынның сауалына жеке-жеке жауап берді.
Айта кетейік, осыған дейінгі кездесулерде Шауғар секторына қатысты 28 мәселе тіркеліп, оның 17-сі орындалса, 11 мәселені оңтайлы шешу жұмыстары жүргізіліп жатыр.
Атап айтқанда, маңызды мәселелердің бірі — инфрақұрылым жүйесін жақсарту дұмыстары қарқынды іске асырылуда. Мәселен, ауыз сумен қамту деңгейін 99,5%-ға жеткізу мақсатында жаңадан қоныстанған тұрғын үйлерге су жүйесін тарту және қайта құрудың 2-кезек жобасы әзірленіп, құрылыс жұмыстары жүргізілуде.
Сондай-ақ 2025 жылы 3200-ден астам абонент сапалы электр қуатымен қамтылып, 2026 жылы 22 шақырым электр желісі тартылады және жаңа трансформаторлар орнатылады. 185 жаңа абонентті табиғи газбен қамту мақсатында жобалық-сметалық құжаттама әзірленуде.
Абаттандыру бағытында 3 жаңа ойын алаңы салынып, барлығы 19 ойын алаңы күтіп-ұстауға алынған. Төле би мен Сабырханов көшелерінің қиылысында МАФ орнату және аулаларды абаттандыру жұмыстары аяқталуға жақын.
Жол жөндеу бойынша сектор аумағында 36 көшеге асфальт төсеу көзделіп, қазіргі таңда 19 көшеде жұмыстар аяқталған. Қосымша 12 көшеге жөндеу жүргізу үшін конкурс жарияланған.
Сектордағы көшелерді жарықпен қамту көрсеткіші 98%-ды құрайды, қалған 8 көшеге жарық орнату тамыз айына жоспарланып отыр. Қауіпсіздік пен цифрландыру бойынша жыл соңына дейін 35 бейнебақылау камерасы орнатылып, байланыс сапасын арттыру үшін 3 базалық станция қойылады.
Сондай-ақ, қазіргі таңда секторда 2 әлеуметтік дүкен жұмыс істейді, қосымша 4 дүкен ашу жоспарланған.
Кездесу барысында қала әкімі тұрғындар тарапынан қойылған сұрақтарға жауап беріп, көтерілген барлық мәселе кезең-кезеңімен және заң талаптары аясында шешілетінін жеткізді.
Сонымен қатар, Әзімбек Пазылбекұлы тұрғындарды қаланың тазалығы мен қоғамдық тәртіпті сақтау бағытында белсенділік танытуға шақырды.
Айта кетейік, қала басшысының халықпен көшпелі кездесуі бүгін 15:00-де ӘІО-ғы 9-шы көше бойында орналасқан №33 мектепте қорытындыланады.
Қоса кететін, «Халық үніне құлақ асатын мемлекет» — бұл Қазақстан Республикасының мемлекеттік басқару жүйесін реформалау мақсатында енгізілген маңызды бастама. Президент Қасым-Жомарт Тоқаевтың осы ұстанымы мемлекеттік органдардың халықпен тығыз байланыс орнатып, халықтың пікірін ескере отырып жұмыс істейтін мемлекет құруға бағытталған.
Тұжырымдаманың басты мақсаты — мемлекеттік органдар мен халық арасындағы сенімді арттыру, қоғамның қажеттіліктеріне дер кезінде жауап беру және әкімшілік жүйенің ашықтығын қамтамасыз ету. Бұл бастама арқылы мемлекет халықтың әрбір ұсынысын, өтінішін, шағымын тыңдап, соған сай шешімдер қабылдауды көздейді.
Негізгі принциптері мен бағыттары:
— Ашықтық және есептілік: Мемлекеттік органдар мен әкімдіктердің өз жұмысын ашық жүргізуі, шешімдер қабылдау процесінің айқын болуы.
Халықтың пікірін ескеру: Мемлекет халықтың тілегін тыңдайды, олармен тұрақты байланыс орнатып, өзекті мәселелерді шешу үшін нақты қадамдар жасайды.
— Әлеуметтік әділеттілік: Мемлекет әрбір азаматтың құқығын қорғап, әлеуметтік әділеттілік орнатуды мақсат етеді. Бұл қоғамның әрбір мүшесінің, әсіресе әлеуметтік жағынан әлсіз топтардың жағдайын жақсартуға бағытталған шаралар қабылдауды қамтиды.
— Жаңа технологиялар мен цифрландыру: Мемлекеттік қызметтердің тиімділігін арттыру үшін жаңа технологиялар мен цифрлық платформаларды пайдалану, халықпен байланысты жеңілдету.
— Жедел кері байланыс: Қоғаммен үнемі кері байланыс орнатып, азаматтардың мәселелеріне жедел жауап беру. Бұл үшін әртүрлі онлайн платформалар мен әлеуметтік желілер қолданылуда.
«Халық үніне құлақ асатын мемлекет» Түркістан облысында:
Түркістан облысында да бұл бастама жүзеге асырылып, азаматтардың өтініштері мен пікірлерін тыңдау жүйесі дамып келеді. Облыстың әрбір тұрғыны өз проблемаларын айта алатын және оларды шешуге ықпал ететін алаңдарға ие. Облыс әкімдігі түрлі қоғамдық тыңдаулар өткізіп, халықтың пікірін ескеретін шешімдер қабылдауды ұстанады. Түркістан облысының әкімдіктері мен мемлекеттік органдары халықпен байланыс орнату үшін заманауи цифрлық платформаларды пайдаланады, осы арқылы әр азаматтың дауысы естіледі.
Қазіргі уақытта Түркістан облысында халықтың мұқтаждығына назар аударып, олардың өтініштерін шешу үшін әкімдіктерде «Азаматтарға арналған қабылдау бөлмелері», «Халыққа қызмет көрсету орталықтары» және түрлі қоғамдық қабылдаулар жиі өткізіледі. Бұл шаралар халықтың мемлекеттік қызметтерге деген сенімін арттырып, өңірдің әлеуметтік-экономикалық дамуына үлес қосуда.
