Жақсылық жасаудың үлкені де, кішісі де болмайды. Ал кейде жасалған бір ғана игі іс, танымайтын жанға ұсынылған көмек қолы бір адамның өмірін арашалап, қайта үміт сыйлауы мүмкін. Осы ізгі де қасиетті мақсатта Түркістан қаласында «Мен донормын» атты ақысыз қан тапсыру акциясы ұйымдастырылды.
Қайырымдылық пен азаматтық жауапкершілікті ту еткен бұл бастамаға Түркістан қалалық Жастар ресурстық орталығының қызметкерлері, ерікті волонтерлер, жоғары және арнаулы орта оқу орындарының студенттері мен шаһардың белсенді жастары біркісідей қатысып, өздерінің азаматтық үлестерін қосты.
Іс-шара Түркістан облыстық қан орталығының арнайы дайындалған медициналық бригадасының қатысуымен өтті. Акцияға келген әрбір жас донор қан тапсыру алдында міндетті түрде медициналық тексеруден өтіп, қан қысымын, гемоглобин деңгейін өлшетіп, дәрігер-терапевттің консультациясын алды. Барлық медициналық талаптар мен санитарлық нормалар қатаң сақтала отырып жүргізілген акцияда ондаған жас өз еркімен қан тапсырып, науқастардың өмірін сақтауға атсалысты.
Донор болу — тек біреуге өмір сыйлау ғана емес, сонымен бірге донордың өз денсаулығы үшін де өте пайдалы. Медицина мамандарының айтуынша, жүйелі түрде қан тапсыру ағзадағы қан айналымын жаңартып, жүрек-қан тамырлары ауруларының алдын алуға, иммунитетті шыңдауға септігін тигізеді. Алайда, бұл акцияның ең басты құндылығы — жастардың бойындағы жанашырлық пен бауырмалдық қасиеттерді оятуында.
«Бірге — қайырымдылыққа! Бірге — жанашырлыққа! Бірге — адам өмірін сақтауға!» деген асқақ ұранмен өткен бұл акция Түркістан жастарының қоғамдағы өзекті мәселелерге бейжай қарамайтынын, волонтерлік пен қайырымдылық қозғалысының өңірде қарқынды дамып келе жатқанын тағы бір мәрте дәлелдеді.
Донор болу — бұл ерекше ерлік емес, бұл ең алдымен жоғары адамгершілік пен азаматтық жауапкершіліктің белгісі. Қан тапсырып, өзгеге үміт сыйлау — әрбір дені сау азаматтың қолынан келетін игі іс. Сенің тапсырған бір тамшы қаның — ауыр дертпен күресіп жатқан жанға өмір сыйлауы мүмкін.
Түркістан қалалық Жастар ресурстық орталығы өкілдерінің хабарлауынша, жастар арасында волонтерлік қозғалысты дамыту, қайырымдылық пен донорлық мәдениетті насихаттау бағытындағы мұндай ізгі акциялар алдағы уақытта да жүйелі түрде ұйымдастырылып тұратын болады.