Түркістан қаласы күн санап жаңарып, көркейіп келеді. Осы бағыттағы жұмыстардың жарқын нәтижесі ретінде Әкімшілік-іскерлік орталықта жаңа демалыс орны – жасанды көлі бар қалалық саябақ ел игілігіне берілді. Бұл нысан – тұрғындар мен қала қонақтарына қолайлы әрі экологиялық таза демалыс аймағын ұсынатын, заманауи инфрақұрылыммен жабдықталған кеңістік.
Саябақтың ашылу салтанатына Түркістан облысының әкімі Нұралхан Көшеров арнайы қатысып, жиналған жұртшылықты маңызды оқиғамен құттықтады. Ол өз сөзінде Түркістан қаласының даму бағытына ерекше тоқталып, өңір тұрғындары үшін қолайлы орта қалыптастыру мақсатында атқарылып жатқан жұмыстардың жалғасатынын атап өтті.
БАЛАЛАРДЫ ҚОРҒАУ КҮНІНЕ АРНАЛҒАН МЕРЕКЕЛІК ІС-ШАРА:
Саябақтың ашылуы 1 маусым – Халықаралық балаларды қорғау күніне орай ұйымдастырылған салтанатты концертпен жалғасты. Қала тұрғындары мен қонақтарының қатысуымен өткен мәдени іс-шарада түрлі жанрдағы өнер туындылары ұсынылды. Кеш қонақтарының назарына би және театрландырылған көріністер, отандық эстрада жұлдыздарының орындауындағы әндер мен ұлттық аспаптарда орындалған шығармалар тарту етілді.
Сахна төрінде Серік Ибрагимов, Нұржан Жүсіпбеков, Гүлмира Құдайбергенова, сондай-ақ дарынды домбырашы балалар тобы өнер көрсетті. Бұған қоса, «Күлтегін» этно-фольклор ансамблі, «Жастар», «Жаңа леп», «Семсер» тобы өз өнерлерін ортаға салып, көпшіліктің ықыласына бөленді. Бұл кеш қала өмірінің мәдени тынысын ашып, жастар мен балалар үшін ерекше әсер қалдырды.
ИНТЕРАКТИВТІ АЙМАҚТАР МЕН ШЫҒАРМАШЫЛЫҚ ІС-ШАРАЛАР:
Шара барысында әр жастағы қонақтар үшін қызықты әрі танымды интерактивті алаңдар ұйымдастырылды. Балаларға арналған аниматорлар шоуы, цирк қойылымдары, «армандар шары» шоуы, түрлі спорттық жарыстар, сондай-ақ сурет салу мен қыштан бұйым жасау бойынша шеберлік сабақтары өтті.
Мұндай форматтағы іс-шаралар балалар мен жасөспірімдердің шығармашылығын дамытуға, олардың бос уақытын тиімді ұйымдастыруға, отбасылық демалысты сапалы өткізуге зор мүмкіндік береді.
САЯБАҚТЫҢ ИНФРАҚҰРЫЛЫМЫ ЖӘНЕ СӘУЛЕТТІК ЕРЕКШЕЛІКТЕРІ:
«Жаңа қала» аумағында орналасқан саябақ жалпы 12,77 гектар аумақты қамтиды. Оның ішінде 38 438 шаршы метр жер көгалдандырылып, 8 мыңға жуық ағаш пен декоративті өсімдіктер отырғызылған. Бұл – экологиялық жағдайды жақсартуға бағытталған маңызды қадам.
Саябақтың орталық элементі – жасанды көл, оның жалпы ауданы 19 500 шаршы метр, ал су сыйымдылығы – 60 000 м³. Көлдің үстінен ұзындығы 92 метр болатын жаяу жүргіншілерге арналған көпір салынған. Бұл көпір саябақтың екі бөлігін байланыстырып қана қоймай, келушілерге көл үстінен тамашалауға мүмкіндік береді.
Көл маңында:
— Шолу алаңы;
— Сарқырама;
— Субұрқақтар;
— Жарықшамдар;
— 270 дана орындық;
— 240 дана қоқыс жәшігі;
— Әкімшілік ғимарат;
— Қоғамдық тамақтану орындары;
— Балалар алаңшалары;
— Жабық шатырлар мен демалыс павильондары, сияқты маңызды нысандар орналасқан.
Бұл – саябақты тек жазда емес, жыл бойына демалыс аймағы ретінде пайдалануға мүмкіндік береді.
ҚАЛА ТҰРҒЫНДАРЫНА ЖАЙЛЫ ДЕМАЛЫС ОРТАСЫ ҚАЛЫПТАСТЫ:
Саябақ бір мезетте 600 адамға дейін қабылдай алады. Ашық алаңдар, табиғи көріністермен үйлескен архитектуралық элементтер, қауіпсіздік стандарттарына сай жабдықтар – мұның бәрі Түркістан қаласының тұрғындары мен қонақтары үшін жаңа сапалы демалыс мәдениетін ұсынады.
Саябақтың іске қосылуы – қаланың әлеуметтік инфрақұрылымын жақсартуға бағытталған ауқымды жобалардың бірі. Сонымен қатар, бұл жоба Түркістан қаласының Бас жоспары мен Дизайн кодына толық сәйкес келеді.
Түркістандағы жаңа қалалық саябақ – тек табиғи аймақ емес, мәдениет пен өнер, отбасылық бос уақыт және экологиялық сана сынды құндылықтарды біріктіретін кешенді жоба. Жобаның жүзеге асуы – Түркістанның тұрғындарына жасалып жатқан нақты қамқорлық пен қаланың қарқынды дамуының көрінісі.
Бүгінгі ашылған демалыс орны – болашақта қала тұрғындарының сүйікті мекеніне айналып, Түркістанның заманауи әрі жайлы шаһар ретіндегі бейнесін айқындай түсетіні сөзсіз.