Созақ ауданы полиция бөлімінің қызметкерлері сенбілік өткізді. Таңертең полиция қызметкерлері әдеттегі формасын жұмыс киіміне ауыстырды, тырмамен, сыпырғышпен, жұмысқа кірісті. Бірнеше сағат бойы бөлімше қызметкерлері тазалық жұмыстарын жүргізді: өздеріне белгіленген орындардан құрғақ жапырақтар мен ұсақ қоқыстардан тазартты, ағаштардың айналасын тазартып, жиектерді ақтады, баспалдақтарды бояды.
Бөлімше қызметкерлері сенбілікке үлкен ықыласпен қатысты. Іргелес аумақты абаттандыру бойынша іс-шараларды өткізу жеке құрам тарапынан қолдау табатын жақсы дәстүр болып табылады. Өйткені, олар ұжымдағы қарым-қатынасты нығайтады. Сенбіліктер алдағы уақытта да өткізілетін болады.
Мемлекет басшысының тапсырмасымен республика бойынша «Таза Қазақстан» экологиялық акциясы бес аптаға созылады. Әр аптаның өзіндік тақырыбы мен нақты мақсаты болмақ.
«Таза өлке». Бірінші аптада елді мекендердің тұрғындары, қоғам қайраткерлері, ұйымдардың қызметкерлері өз аумағындағы аулаларды тазалайды.
«Киелі мекен». Екінші апта тарихи-мәдени ескерткіштердің аумағын абаттандыруға арналады.
«Жасыл аймақ». Үшінші аптада көшет отырғызу, ағаштарды әктеу жұмыстары жүргізіледі.
«Өнегелі ұрпақ». Акцияның төртінші аптасында ардагерлердің аулалары мен қарттар үйінің аумағын тазалау, абаттандыру көзделеді.
«Мөлдір бұлақ». Акцияның қорытынды, бесінші аптасында өзендер мен көлдер қоқыстан тазартылады.
Түркістан облысы ПД баспасөз қызметі
