2025 жылдың бірінші жартыжылдығында Сауран ауданының әкімі Мақсат Таңғатаров Майдантал ауылдық округінің тұрғындарымен ашық форматта кездесу өткізді. Жиын барысында ауылдың әлеуметтік-экономикалық жағдайы, шешімін күткен мәселелері мен алдағы даму жоспарлары жан-жақты талқыланды. Мұндай кездесулер тұрғындармен тығыз байланыс орнатуға, елді мекеннің қажеттіліктерін ескеріп, нақты қадамдар қабылдауға мүмкіндік беретін маңызды алаңға айналып келеді.
Кездесуге ауыл тұрғындары, ардагерлер кеңесінің мүшелері, жастар, кәсіпкерлер мен әлеуметтік сала өкілдері қатысты. Жиын ашық әрі сындарлы диалог форматында өтті. Көпшіліктің көкейінде жүрген мәселелер мен ұсыныстар тікелей айтылып, олар бойынша нақты жауаптар мен шешу жолдары ұсынылды.
Атқарылған жұмыстар – нақты нәтижелер:
Алқалы жиында алдымен Майдантал ауылдық округінің әкімі Жандос Досболов 2025 жылдың қаңтар–мамыр айлары аралығында атқарылған жұмыстар туралы есеп берді. Оның айтуынша, бес айда округ көлемінде бірқатар маңызды жобалар жүзеге асырылған. Жалпы көлемі 34,7 млн теңге көлемінде бюджет қаражаты игерілген. Сонымен қатар, салық және жер сатылымы арқылы 7,2 млн теңге көлемінде қосымша кіріс түскен.
Ауыл шаруашылығы саласы – округтің басты экономикалық тірегі болып табылады. Биылғы жылы жалпы көлемі 1606 гектар жерге ауыл шаруашылығы дақылдары егілген. Сонымен қатар, округ бойынша 24 мыңнан астам мал басы тіркеліп, ветеринарлық іс-шаралар толық жүргізілген. Бұл көрсеткіштер ауыл шаруашылығының тұрақты дамып келе жатқанын айғақтайды.
Кәсіпкерлік саласына да айтарлықтай көңіл бөлініп отыр. 2025 жылдың алғашқы жартысында жеке инвестиция көлемі 216 млн теңгені құрап отыр. Бұл қаражат есебінен бірқатар жобалар қолға алынған. Атап айтқанда, жеке меншік балабақша құрылысы мен 400 ірі қараға арналған заманауи бордақылау алаңының құрылысы басталған.
Инфрақұрылым мен әлеуметтік нысандар жаңартылуда:
Ауылдың инфрақұрылымын жақсарту бағытында да жүйелі жұмыстар жүргізіліп жатыр. Егізқара, Ынталы және Қаражон елді мекендерінде жол жөндеу, ауыз су жүйесін қалпына келтіру, электр желілерін жаңарту, сондай-ақ саябақ пен спорт кешенін салу жұмыстары қарқын алды. Бұл жобалар ауыл тұрғындарының өмір сүру сапасын арттыруға және жастардың бос уақытын тиімді ұйымдастыруға бағытталған.
Ағымдағы және алдағы кезеңде ауылдың сәулеттік келбетін жақсарту мақсатында балалар ойын алаңы, жол бойындағы аялдамалар мен ауыл кіреберісіндегі арка жөнделіп, жаңғыртылады. Бұл жұмыстар 2025–2026 жылдарға жоспарланған.
Тұрғындар көтерген өзекті мәселелер:
Кездесу барысында ауыл тұрғындары тарапынан түрлі ұсыныстар мен сұрақтар көтерілді. Негізінен, білім беру, денсаулық сақтау, жұмыспен қамту және ауыл шаруашылығына қолдау көрсету бағытында мәселелер басым болды. Әсіресе, мектеп ғимаратын жаңарту, медициналық пункттің материалдық базасын жақсарту, ауыл жастарына арналған жаңа жұмыс орындарын ашу, сондай-ақ жер және субсидиялау мәселелері бойынша ұсыныстар айтылды.
Тұрғындар ауылда кадр тапшылығы мәселесіне де назар аударды. Әсіресе, білім мен денсаулық сақтау саласында жас мамандарды тарту қажеттігі ерекше аталды. Бұл мәселе бойынша аудан әкімдігі облыстық деңгейдегі тиісті органдармен бірлесіп нақты жұмыстар жүргізіп жатқанын атап өтті.
Аудан әкімінің пікірі мен келешекке жоспарлар:
Сауран ауданының әкімі Мақсат Таңғатаров тұрғындардың барлық сұрақтарына толық әрі нақты жауап беріп, ауылды дамыту бойынша жоспарланып отырған жобалармен таныстырды.
«Майдантал ауылдық округі – Сауран ауданының экономикалық, әлеуметтік тұрғыда әлеуеті зор аймағы. Біз бұл мүмкіндікті толық пайдалануға тиіспіз. Алдағы уақытта ауыл шаруашылығына инвестиция тарту, инфрақұрылымды дамыту, жаңа жұмыс орындарын ашу – біздің негізгі басым бағыттарымыз болады. Бұл бағытта нақты жобалар мен жоспарлар әзірленіп, кезең-кезеңімен жүзеге асады», – деді аудан басшысы.
Сонымен қатар, әкім мемлекеттік бағдарламалар аясында ауыл тұрғындары үшін шағын несие беру, кәсіпкерлікпен айналысуға қолдау көрсету және әлеуметтік нысандардың құрылысына қажетті қаржыландыру тарту мәселелері де қарастырылып жатқанын жеткізді.
Кездесу соңында аудан басшысы ауыл тұрғындарын белсенділік танытуға, өз ұсыныстарын ашық айтуға шақырып, билік пен халық арасындағы байланысты одан әрі нығайту қажеттігін баса айтты. Мұндай кездесулер – жергілікті атқарушы биліктің ашықтығын, есептілігін көрсететін тиімді құралдардың бірі болып табылады.
Майдантал округінің бүгінгі даму қарқыны мен тұрғындардың белсенділігі ауылдың келешегіне сеніммен қарауға негіз береді.