Келес ауданының орталығы – Абай ауылында экологиялық мәдениетті көтеру, тұрғындардың санитарлық-экологиялық жауапкершілігін арттыру және елді мекеннің келбетін жақсарту мақсатында «Асар» дәстүрлі әдісімен кең көлемдегі тазалық жұмыстары ұйымдастырылып, белсенді түрде жүзеге асырылуда. Бұл игі шара елімізде қолға алынған «Таза Қазақстан» ұлттық экологиялық акциясының аясында іске асырылып отыр.
Аудан әкімдігінің қолдауымен ұйымдастырылған тазалық жұмыстарына 200-ден астам азамат тартылды. Олар қоғамдық ақылы жұмыс аясында аудан орталығының тазалығына өз үлестерін қосып, үлкен еңбекке жұмылдырылған. Еңбекке қатысушылар бірнеше топқа бөлініп, Абай ауылының негізгі және ішкі көшелерін санитарлық тазалаудан өткізуде. Әсіресе, шөп ору, арықтарды қоқыстан тазарту, көше бойындағы бұта мен ағаштарды бұтап ретке келтіру, үйінділер мен тұрмыстық қалдықтарды арнайы орындарға шығару жұмыстары жүйелі жүргізілуде.
«Асар» – ынтымақтың символы:
Жалпы, «асар» – халқымыздың көне дәстүрінен бастау алған, қоғамдық бірлік пен ортақ іске жұмыла кірісуді білдіретін ұғым. Осы жолғы тазалық шарасында да көпшілік жұмылып, бір ауылдың көркеюіне ортақ мүдде тұрғысынан үлес қосты. Бұл әдіс қазіргі заман жағдайында ауылдық жерлерде өз тиімділігін көрсетіп келеді. Қоғамдық жұмыспен қатар, тұрғындардың өз еркімен келіп көмектесіп жатқаны да атап өтуге тұрарлық.
Келес ауданының әкімі Жәнібек Есен тазалық жұмыстарының барысын арнайы бақылап, жұмысшылармен пікірлесіп, ауыл тұрғындарын санитарлық мәдениетті ұстануға шақырды. Ол өз сөзінде:
«Тазалық – денсаулық кепілі ғана емес, ол – ел мәдениетінің көрсеткіші. Қоршаған ортаны күтіп ұстау – баршамыздың азаматтық парызымыз. Мұндай шаралар тек бір мезгілдік емес, тұрақты түрде жалғасуы қажет. Біз Абай ауылын ғана емес, ауданымыздың барлық елді мекендерін таза әрі көрікті етуге міндеттіміз», – деп атап өтті.
Тазалықпен бірге – дамудың да дүмпуі:
Айта кету керек, тазалықпен қатар Абай ауылында ірі әлеуметтік инфрақұрылым нысандарының құрылысы да қарқынды жүргізілуде. Атап айтқанда, Асан Қайғы көшесі бойынан жаңа типтегі 1200 орындық «Жайлы мектеп», заманауи Музей, Жас буынды дамыту орталығы және Спорт кешенінің құрылысы басталған. Бұл нысандар халық игілігіне берілгенде, ауылдың әлеуметтік-мәдени келбеті түбегейлі өзгереді.
Сонымен қатар, Жылқышиев көшесінің бойынан бой көтерген демалыс аймағы – Арбат та тұрғындардың сүйікті орнына айналып үлгерді. Бұл демалыс аумағы заманауи стандарттарға сай безендіріліп, отбасылық демалыс пен жастардың бос уақытын тиімді ұйымдастыруға арналған. Алдағы уақытта осы көшені Абай көшесіне дейін кеңейту жұмыстары жоспарланып отыр.
Инфрақұрылым – абаттандырумен үндесуі керек:
Абай ауылындағы негізгі және ішкі көшелердің бірқатары тозғаны белгілі. Осыған байланысты аудан орталығындағы жолдарды кезең-кезеңімен орташа жөндеуден өткізу, тротуарлар салу және жарықтандыру жүйесін жаңарту – күн тәртібіндегі басты міндеттердің бірі. Сондай-ақ, орталық автобекет маңын абаттандыру және көгалдандыру жұмыстары да жобаланып, тиісті қаржы көздері қарастырылуда.
Мұның барлығы халықтың өмір сүру сапасын жақсартуға, қауіпсіз әрі ыңғайлы орта қалыптастыруға бағытталған.
Тазалық акциясы жалғасады:
«Асар» әдісімен ұйымдастырылған бұл экологиялық шара ауданның өзге ауылдық округтерінде де кезең-кезеңімен жүзеге асырылады. Келес ауданы әкімдігі бұл жұмыстардың маусымдық емес, жүйелі түрде және тұрғындармен тығыз байланыста жүргізілетінін мәлімдеді. Сонымен қатар, тұрғындарды қоршаған ортаға жанашырлықпен қарауға, тазалыққа бейжай қарамауға үндейтін экологиялық үгіт-насихат жұмыстары да күшейтілмек.
Келес ауданындағы тазалық жұмыстары – бұл жай ғана сенбілік шара емес, қоғамдық тәртіп пен жауапкершіліктің көрінісі, болашақ ұрпаққа үлгі боларлық нақты іс. Аудан басшылығы мен тұрғындарының ортақ күш-жігері нәтижесінде Абай ауылы жаңа келбетке ие болуда. Мұндай бастамалар ұлт денсаулығы, қоршаған орта және ұрпақ тәрбиесі үшін де айрықша маңызға ие.
