Сәкен Сейфуллин атындағы мектеп-лицейінде түсіндірме іс-шара өткізілді.
Бүгінде қоғамда кең таралып келе жатқан қауіптердің бірі – интернет алаяқтығы мен лудомания (ойынқұмарлық). Бұл екі құбылыс әсіресе жасөспірімдер арасында алаңдаушылық тудырып отыр. Осыған орай, жастарды ақпараттық қауіп-қатерлерден сақтау, құқықтық сауаттылығын арттыру мақсатында Сәкен Сейфуллин атындағы мектеп-лицейінде арнайы түсіндірме іс-шара ұйымдастырылды.
Іс-шараның мақсаты – құқықбұзушылықтың алдын алу және сақтандыру:
Кездесуге мектеп оқушылары мен ұстаздар қауымы қатысты. Іс-шара барысында оқушыларға интернет алаяқтарының әрекет ету тәсілдері, олардың жиі қолданатын алаяқтық схемалары, сондай-ақ онлайн ойынқұмарлықтың психологиялық және әлеуметтік зардаптары туралы кең көлемде ақпарат ұсынылды.
Мамандар оқушылардың назарын қазіргі қоғамдағы тәртіп пен құқықтық мәдениеттің маңыздылығына аударып, заңсыз әрекеттерге жол бермеу жолдарын жан-жақты түсіндірді.
Көрсетілім және пікір алмасу:
Шара барысында қатысушыларға арнайы бейнематериалдар көрсетіліп, онда интернет алаяқтығы мен лудомания құрбандарының нақты оқиғалары баяндалды. Бұл бейнероликтер оқушылардың қауіпті жағдайларды тез танып, оларға қарсы тұра білу дағдыларын қалыптастыруға бағытталды.
Іс-шара интерактивті форматта өтіп, оқушылар сұрақ қойып, мамандардан тікелей жауап алу мүмкіндігіне ие болды. Бұл – құқықтық түсініктің нығаюына және жасөспірімдердің саналы таңдау жасауына оң әсер етті.
Жиналысқа қатысқан мамандар:
— С. Ержанқызы – Ішкі саясат бөлімі, “Жастар ресурстық орталығы” КММ-нің инспектор маманы;
— Н. Асқаров – Түркістан қалалық полиция басқармасы, Криминалдық полиция бөлімінің аға жедел уәкілі, полиция майоры;
— Е. Өңдірбай – Түркістан ҚПБ ЖПҚ ЮПТ УПИ, полиция капитаны;
— А. Досова – Мектеп директорының тәрбие ісі жөніндегі орынбасары;
— Д. Джуманова – Мектеп мұғалімі.
Мамандар өз сөздерінде жасөспірімдер арасында құқықтық мәдениетті қалыптастырудың маңызына тоқталып, әрбір оқушының заң талаптарына бағынуы – ел болашағына деген жауапкершіліктің бір көрінісі екенін атап өтті.
Қауіпсіз болашақ үшін бірлескен қадам:
Осындай іс-шаралар – тек ақпарат берудің ғана емес, жастарды салауатты, саналы өмірге бейімдеудің маңызды құралы. Интернет пен цифрлық технология дамыған заманда ақпаратты дұрыс пайдалану, онлайн қауіптерден қорғану және өз құқықтарын білу – әрбір жасөспірім үшін маңызды.
Сақтансаң – сақтайды. Ақпараттық сауаттылық – қауіпсіздік кепілі.
