«БАЛАЛЫҚ ШАҚТЫҢ МЕКЕНІ» АТТЫ ШЕРУ МЕРЕКЕЛІК КӨҢІЛ КҮЙ СЫЙЛАДЫ

Балалар – біздің болашағымыз, оларды желеп-жебеп жүру — қоғам қамқорлығының басты аспектісі. Бұл күн әр балаға қауіпсіз балалық шақ сыйлап, болашақта бақытты болып, табысқа жетуге көмектесетін білім, қамқорлық пен махаббатқа ие болу мүмкіндігін беру қажеттігі туралы есімізге салады. Біздің қоғам балалардың қауіпсіздігі мен амандығын бірінші орынға қойып, барлық қауіп-қатерден қорғау үшін қолдан келгеннің бәрін жасауға тиіс.
Мерекелік күннің негізгі міндеті – Халықаралық конвенцияда бекітілген, балалар құқықтарын қоғамға тағы бір рет еске салу әрі оны насихаттау болып табылады. Олардың қатарына төмендегілер жатады:
— Өмір сүру құқығы. Балалар өмірі түрлі әскери қақтығыстардан, ауыр сырқаттардан, аштық пен кедейліктен қорғалуы тиіс.
— Лайықты өмір сүруге, тәрбие алуға, оқуға және физикалық әрі рухани тұрғыда дамуына тең құқылы болу.
Балалар құқығын қорғау күнінде сонымен бірге әлем бойынша балаларға қатысты шешілмеген, түйткілді мәселелерге назар аударып, оны шешу жолдарын ұсынуға баса мән беріледі. Мұндай өзекті мәселелердің қатарына мыналар жатады:
— Кей елдерде халықтың басым көпшілігі, оның ішінде балалар аштықтың зардабын шегеді.
— Балалар әскери қақтығыстардан, ЖИТС, ВИЧ-инфекциясы және өзге де күрделі аурулардан көз жұмады.
— Үшінші әлем елдерінде кәмелет жасына толмаған балаларды ауыр еңбекке салып, құлдыққа сатады.
— Оқу орындарының болмауы салдарынан кей балалар кейде тіпті бастауыш мектепте білім ала алмай жатады.
Балаларды қорғау күні – бұл тек балалар үшін ғана емес, сонымен бірге ересектер үшін де маңызды күн. Бұл күн бізге балалардың қоғамдағы орны және олардың әлеуметтік, эмоционалдық, физикалық және интеллектуалды дамуы үшін жасалатын күш-жігерлер туралы ойлануға мүмкіндік береді. Бұл күн – әрбір баланың өмір сүруіне жағымды әсер ететін орта құрудың маңыздылығын еске салады.
Бүгінгі таңда балалардың құқықтарын қорғау – бүкіл әлем бойынша өзекті мәселе. Бұл күні біз, ересектер, балаларымыздың жарқын болашағы үшін жауапты екенімізді мойындаймыз және олардың әрқайсысының дамуына ықпал ету үшін өз үлестерімізді қосамыз. Бұл күн бізге балаларға деген махаббатымызды және оларға деген құрметімізді білдіру үшін тағы бір мүмкіндік береді.
Балаларды қорғау күні мереке ғана емес, сонымен қатар, болашаққа бағдар жасайтын маңызды шараның бірі. Адамзаттың алдында тұрған зор міндет — болашақ ұрпақтың бақытты өмірін қалыптастыру.
Арбат демалыс аймағында өнерпаздардың “Балалық шақтың мекені” атты шеруі бүгінгі мерекені айшықтай түсті. Шымкент қалалық қуыршақ және жасөспірімдер театрының ұйымдастыруымен өткен мерекелік шараға Оқушылар сарайының барабаншылар тобы, Саз колледжінің үрмелі және ұлт аспаптар оркестрі, театр қуыршақтары мен балалар персонаждары атсалысты.
Мерекелік репертуар, музыкалық аспаптардың үйлесімі, сазды-театрландырылған шеру көпшілікке ерекше әсер сыйлады. Шеру Оталық саябаққа дейін жалғасты.
Мереке құтты болсын! Балаларға көтеріңкі көңіл-күй, армандарының орындалуын және жазғы демалысты жақсы өткізулерін тілейміз!