Бүгін қала әкімі Ғабит Сыздықбековтің төрағалығымен өткен аппараттық мәжілісте жер телімдерін мемлекет мұқтаждығына қайтару, кәмелетке толмағандар арасында суицидті алдын алу шаралары мен өзге де мәселелер қаралды.
Теориялық тұрғыдан өз-өзіне қол жұмсау өте қауіпті, бірақ алдын алуға болатын және болжауға болатын құбылыс. Өз-өзіне қол жұмсау 15 жастан 25 жасқа дейін және егде жаста – 70 жастан кейін жиі болатыны анықталды. Статистикаға сәйкес, әлемде өзіне-өзі қол жұмсау салдарынан жыл сайынғы өлім-жітім барлық өлімнің шамамен 1%-ын құрайды. Ерлердің әйелдерге қарағанда өз-өзіне қол жұмсау ықтималдығы 4 есе жоғары. Суицид салдарынан қайтыс болған адамдардың 90%-дан астамында психикалық патологиялардың, терең күйзеліске түскені анықталған.
Суицидтік мінез-құлық ғасырлар бойы зерттелгенімен, бүгінгі таңда суицидтің биологиялық табиғатын түсіндіретін бірде-бір теория жоқ.
Әртүрлі концепциялардың ішінде суицидтің үш негізгі теориясын бөліп көрсетуге болады. Олар: психопатологиялық, психологиялық және социологиялық.
Суицидтік ойлардың алдын алу үшін мемлекеттің, қоғамның және әртүрлі сала мамандарының көмегі қажет. Дұрыс ақпарат, психологиялық көмектің болуы, профилактикалық бағдарламаларды жүзеге асыру – мұның бәрі осы проблемамен күрестің ажырамас бөлігі болып табылады. Әр адамға деген ілтипат пен қамқорлық, қолдау мен бағыт-бағдар беру ғана суицидтік тенденцияларды барынша азайтып, әр адамның өмірін сақтап қалады.
Жер ресурстарын басқару департаментінің басшысы М.Ақылбектің айтуынша, жер учаскелерін заңсыз иеленген, мақсатсыз пайдаланған 112 жеке және заңды тұлғадан 27 млн. теңгенің айыппұлы өндірілген. Кала басшысының бастамасымен саябақтар мен аллеяларға, заңсыз жер телімдеріне қатысты тексеру жұмыстары жүргізілген.
Мәжіліс барысында қала әкімінің орынбасары С. Құранбек кәмелетке толмағандар арасында суицидті алдын алу шараларын баяндады. Ата-ана, оқушы-мектеп байланысын қалыптастыру мақсатында «Ата-аналарды педагогикалық қолдау орталығы» мен «Даналық мектебі» құрылды. Білім беру ұйымдарында «Аталар мектебі», «Әжелер мектебі», «Жеңгелер мектебі», «Ағалар мектебі», «Ұлдар клубы», «Қыздар клубы» жобалары іске асырылуда.
Балалар өмірі мен денсаулығының аса маңызды екеніне тоқталған қала әкімі жауаптыларға жас ұрпаққа сапалы білім, саналы тәрбие берумен қатар олардың қауіпсіздігін қамтасыз етуде профилактикалық жұмыстарды күшейтуді тапсырды.
Шымкент қаласы әкімінің баспасөз қызметі
