Шымкент қалалық «Ассамблея жастары» ұйымының белсенділері «Shymkent Plaza» сауда, ойын-сауық орталығы маңында «Үйде сөйле» жобасы аясында тұрғындар арасында блиц-сұхбат жүргізді.
Жобаның мақсаты — қазақ тілін оқыту мен қолдануға, сондай-ақ, этносаралық қарым-қатынас тілі ретінде дамытуға кең мүмкіндіктер жасау. Бастаманы жүзеге асыра отырып, «Ассамблея жастары» үйден алыстамай қазақ тілін қол жетімді және қызықты форматта қолдануға мүмкіндік жасайды.
Қазақстан Республикасы Парламенті Сенатының депутаты Геннадий Шиповскихтің айтуынша, қазіргі заманауи технологиялар мен мүмкіндіктерді пайдалану мемлекеттік тілді меңгерудің тиімді тәсілі болып табылады, сондықтан «Үйде сөйле» жобасы сияқты азаматтық бастамалар қарапайым азаматтар тарапынан тікелей кері байланыс алады. Оның сөзінше, біздің әрқайсымыздың міндетіміз-қазақ тілін этносаралық қарым-қатынас тілі ретінде ілгерілетуге ықпал ету. Қазақстан халқы Ассамблеясының жастары мұндай жобаларды тек жастарды ғана емес, әртүрлі жастағы өкілдерді де тарта отырып, табысты жүзеге асыруда.
Аула клубтарының әлеуетімен қазақ тілін практикалық тұрғыда үйретуді көздейтін жобаға жауаптылар этнос өкілдеріне мемлекеттік тілде сұрақтар қойып, олардың қазақ тілін меңгеру деңгейін зерделеді.
Қалалық «Ассамблея жастары» ұйымы өкілдігінің жетекшісі Нұрболат Мейірбековтің айтуынша, жоба аясында жұртшылықтың мемлекеттік тілді меңгеруге деген құлшынысы пайымдалып, аула клубтары базасында тіл үйренуге ынталы азаматтарға тілді оқытып-үйретудің тиімділігі сараланған.
Блиц-сұхбат барысында этнос өкілдерінің қазақ тілін базалық деңгейде меңгергендігіне көз жеткізген белсенділер 2023-2025 жылдары аралығында нәтижелі іске асыру межеленген әрі үш кезеңді қамтитын «Үйде сөйле» жобасы бойынша жоспарлы жұмыстарды Шымкенттің Әл-Фараби, Тұран, Еңбекші аудандары аумағында жүзеге асыратынын атап өтті.
