Бүгін «AMANAT» партиясы Шымкент қалалық филиалында мәслихат депутаты, фракция мүшесі Қозбахов Шыңғыс Лесбайұлы кестеге сәйкес кезекті қоғамдық қабылдауын өткізді.
Халық қалаулысы тұрғындардың өтініштері мен ұсыныстарын тыңдап, шешілу жолдарын қарастырды.
Қабылдауға келген азаматтар әлеуметтік, баспана, балалардың мектепке дейінгі дайындық мәселелері бойынша сауалдарын жолдап, нақты шешімдер мен түсіндірме жұмыстарына ризашылықтарын білдірді.
Тұрғындар тарапынан түскен өтініштер мен ұсыныс-тілектер заң аясында қаралып, қабылдау нәтижесі бойынша мәселелер оң шешімін тапты.
Еске саларлық, 21 маусым күні «AMANAT» партиясы Шымкент қалалық филиалының төрағасы Бахадыр Мәдәліұлы Нарымбетов бұқаралық ақпарат құралдары өкілдеріне партияның 2023-2027 жылдарға арналған «Халықпен бірге!» сайлауалды бағдарламасын орындауға бағытталған қалалық Жол картасын таныстырды.
Халықтың өмір сапасын көтеруге, табысын еселеп, өмір сүру жағдайын жасап, білім беру, денсаулық сақтау, мәдениет және спорт саласының қолжетімділігін арттыру, экологиялық ахуалды жақсартуды көздеген бағдарламаны орындауға жетелейтін Жол картасы 4 басымдық, 100 тармақ, 452 индикаторлық бағыт пен 43 245 нақты іс-шараларды қамтыйды.
Жол картасы – бұл сайлауалды бағдарламаның әрбір тармағы бойынша көрсеткіштерді, мерзімін және орындаушылары көрсетілген нақты іс-қимыл жоспары. Бағдарламада қаланы дамытудағы өзекті мәселелердің шешілу жолдары белгіленіп, осындай бірнеше бағытқа топтастырылған.
«Қалалық сайлауалды бағдарламамыз тұрғындарды алаңдататын өзекті мәселелері басшылыққа алынып, 10 мыңға жуық өтініштерді зерделей келе дайындалды. Сонымен бірге, сайлауалды науқан кезеңінде үміткерлеріміз қоғамдық қабылдау мен көшпелі кездесулер өткізіп, нәтижесінде 2581 ұсыныс-тілектер келіп түсті. Аталған өтінімдер назарға алынып, Жол картасына өзгерістер мен толықтырулар енгізілді. Әлі де алдағы уақытта Жол картасына тұрғындардың ұсыныстары мен тілектері келіп түсіп жататын болса, депутаттық сауалдар арқылы жүзеге асыратын боламыз»,- деді Бахадыр Мәдәліұлы.
Жол картасына сәйкес, қалада 90 мың жұмыс орны ашылады, кәсіпкерлік саласында жұмыспен қамтылғандар саны 230 мың адамнан асады, жастар жұмыссыздығының деңгейі 3,2%-ға дейін төмендеп, 18 медициналық мекемелер, перзентхана және көпбейінді аурухана ашылады, 50 мектеп пен 10 қосымша ғимараттар салынады. Үш ауысымды мектептер саны түбегейлі жойылады.
