Шымкент қаласындағы «Солтүстік Батыс» және «Нұршуақ» шағын аудандарының ауыл билерімен белсенді азаматтарының, жастар өкілдерінің қатысуымен қоғамдық келісім мәселесіне арналған кездесу өтті, деп хабарлайды R-factor.kz ақпарат агенттігі.
Кездесуге ішкі саясат және жастар істері жөніндегі басқармасы «Қоғамдық келісім» мекемесі мен Абай ауданы әкімдігінің жауапты қызметкерлері қатысты.
Аталған кездесудің мақсаты – жергілікті тұрғындарға, жастар өкілдеріне қоғамдық келісімді сақтау, этнос өкілдері арасында мемлекеттік тілдің қолданылу аясын нығайту, құқықтық тәрбие мен жастар арасында әскери міндеттілікті өтеу мәселелерін түсіндіру болды.
Еркін форматта өткен жүздесуде жалпыұлттық бірлік саласындағы мемлекеттік саясатқа қатысты жұртшылықтың ұсыныс-пікірлері тыңдалып, өзекті мәселелер бойынша жедел сауалнама жүргізілді. Бүгінде Шымкент қаласы аумағындағы 23 тұрғын алапта этнос өкілдері жинақы қоныстанған. Осы аумақтағы тұрақтылықты сақтау, мемлекеттік саясат пен қолданыстағы заң талаптарын түсіндіру, жағымсыз жағдайлардың алдын алу бағытында жыл басынан бері 54 мақсатты кездесу өткізіліп, этносаралық қарым-қатынасқа ықпал ететін ықтимал жағдайларға талдау жасалды.
Кездесуде абыройлы ақсақалдар мен белсенді азаматтар сөз сөйлеп, өскелең ұрпақ — жас буынға дұрыс тәрбие беру жайлы талқыланды.
Еске сала кетейік, Шымкент қалалық Қазақстан халқы Ассамблеясы жанынан 17 этномәдени бірлестік қызмет атқарып жатыр. Ал, олардың жанында 21 шығармашылық ұйым мен 3 жексенбілік мектеп жұмыс істейді.
Көпұлтты мемлекет әрқашан достық пен татулықтың үлгісіне айналуы қажет. Бұл тұрғыда талай ұлт өкілдеріне пана болып келе жатқан еліміз жалпыұлттық тұтастықты нығайту жолында жұмыс істеп келе жатқан саяси институттардың жұмысын лайықты бағалап келеді. Жүзі басқа болғанмен жүрегі бір отандастардың ортақ үйіне айналған елімізде Қазақстан халқы Ассамблеясының тұрақты жұмыс істеп келе жатқанына ширек ғасырдан астам уақыт өтті.
