Мақтаарал ауданындағы мәдениет үйінде «Отан қорғаушылар күні» мен «Ұлы жеңістің 78 жылдығына» арналған мерекелік іс-шара өтті. Жиын қос мерекеге арналған фотоқұжаттық көрмемен бастау алды. Сонымен қатар жиналғандар назарына соғыс жылдарындағы батырлардың ерліктері туралы бейнефильм ұсынылды.
Сахнаға алғашқы құттықтау сөзімен Мақтаарал аудандық поилция бөлімінің бастығы полиция майоры Е.Надиров шығып, ыстық лебізін білдірді. Атаулы мерекеде қызметтік міндетін жоғары атқарған полицейлерге Мақтаарал ауданының әкімі Б.Асанов, Мақтаарал аудандық мәслихатының хатшысы Қ.Сәрсекбаев пен Мақтаарал АПБ басшылығының марапаттары табысталды.
Ал Мақтаарал аудандық полиция бөлімі ардагерлер кеңесінің төрағасы Ә.Жолдыбаев барша Қазақстан халқын және тәртіп сақшыларын мерекемен шын жүректен құттықтап, ізгі тілегін жеткізді.
Іс-шара одан әрі керемет концерттік қойылымға ұласып, күміс көмей әншілер тамылжыта ән салып, көпшілікті тәнті етті. Мақтаарал АПБ қызметкерлері барша Қазақстан халқын айтулы мерекемен шын жүректен құттықтап, Ұлы Отан соғысы ардагерлеріне шексіз алғыс айтып, ерліктеріне тағзым етеді.
