Түркістан облысы Полиция департаментінің мәжіліс залында «Ұлттық рух – ұлт азығы» тақырыбында аға буын ардагерлер мен жеке құрамның кездесуі өтті.
Іс-шараға Қазақстан Ардагерлері қауымдастығының төрағасы Бақытбек Смағұл және республикамыздың барлық өңірлерінің Ауған соғысы ардагерлері мен мүгедектер одағының төрағалары келді.
Кездесудің негізгі мақсаты — полиция қызметкерлерін қазақстандық патриотизм рухында тәрбиелеу, заңдылық пен моральдық-психологиялық тұрақтылыққа тәрбиелеу.
“Біз “патриотизм” деген сөзді ұранға айналдырып жібергеннен кейін бе екен, бұл сөз ұнамайды. Кейде бұл жасанды, өтірік сөз болып көрінеді. Бұл сөзді ұғым ретінде қабылдасақ, патриотизм – сөзбен айтатын, кеуде керетін немесе қазақ болып туғанына мақтанатын сезім емес. Отансүйгештік әр адамның іс-әрекетінен көрінуі керек деп есептеймін. Ең оңай көрінісі – мемлекетке зиян тигізбеу, пара берме, пара алма, лауазымды асыра пайдаланба, қолдан келгенше отандық өнімдерді тұтын, салықты уақытылы төле деген секілді қарапайым дүниелер.
Жиын барысында Б.Смағұл бастаған өмір тәжірибесі мол ардагерлеріміз сөз сөйлеп, жас мамандарды Отанға берген антына адал болуға шақырды. Ел қорғау бағытындағы қызметтерін қолдайтындықтарын жеткізіп, сәттілік тіледі.
Сонымен қатар Полиция департаменті бастығының міндетін атқарушы Бағланбек Айтпаевқа, Түркістан облысы ІІО мен ҰҰ ардагерлер кеңесінің төрағасы Оспанғазы Жанқожаевқа «Батыр шапағаты» төсбелгісі табыс етілсе, қызметтік міндеттерін адал атқарып, жоғары көрсеткіштерге қол жеткізген полицейлерге грамота берілді.
Түркістан облысы ПД баспасөз қызметі
