Балалардың құқықтарын қорғаудың және олардың ел өміріне қатысуын қамтамасыз етудің жаңа тетіктерін енгізу мақсатында әр өңірде балалар омбудсмендерінің жаңа құрамы жасақталды. Оған жоғары сынып оқушылары, мектеп парламентінің көшбасшылары, белсенділер, еріктілер қатарынан 40 жастар өкілі енді.
Бұл бастама баланың құқықтарын іске асыруға және өзін-өзі басқару қызметі арқылы балалардың қоғамдық өзгерістерге белсенді қатысуына бағытталған.
«Балалардың дауысы ересектерге жетуі тиіс және олар өздерінің әл-ауқатына әсер ететін барлық мәселе бойынша шешім қабылдауға қатысуға құқылы. Балалардың өз құқықтарын білуі және түсінуі, оларды жүзеге асыруы, қорғауы үшін қолайлы жағдай жасау маңызды. Балалар өкілдіктері балалардың әл-ауқатын қамтамасыз етудің маңызды құралының біріне айналады», — деп атап өтті ҚР Оқу-ағарту министрлігі Балалардың құқықтарын қорғау комитеті төрағасының орынбасары Юлия Овечкина.
Мемлекет басшысы атап өткендей, «Балалардың құқықтарын қорғау, өскелең ұрпақтың денсаулығы, білімі мен дамуы – біздің басты басымдықтарымыз», сондықтан біз Қазақстандағы барлық балалардың бақытты өмір сүруін қамтамасыз етуге тиіспіз және әрбір баланың даусын тыңдауға міндеттіміз.
«Балалардың хал-ахуалы» ұғымы бірқатар көрсеткіштерді көрсетеді: материалдық хал-ахуал, денсаулық жағдайы және қауіпсіздік, білім, отбасындағы және құрдастарымен қарым-қатынас, мінез-құлық пен тәуекелдер, балалар мен жасөспірімдердің әл-ауқатын субъективті қабылдауы.
Балалар өкiлдiктерi өз қатарластарының құқықтарын қорғау, олардың әлеуметтiк бастамаларын қолдау жөнiндегi өзектi проблемаларды шешуге жәрдемдесіп, балалар мүддесі үшін мемлекеттiк саясатты қалыптастыруға, балалық шақ мәселелерi бойынша нормативтiк құқықтық актiлердi әзiрлеуге балалардың интеллектуалдық әлеуетiн тартуға, балалар ортасында құқықтық мәдениеттi, азаматтық көзқарасты және әлеуметтiк жауапкершiлiктi қалыптастыруға қатыса алады.
Сондай-ақ балалар омбудсмендері балалар құқықтары жөніндегі өңірлік уәкілдермен ынтымақтастықта жұмыс жасау арқылы барлық балалардың мүдделерін неғұрлым тиімді қорғауға атсалысады. Айта кетейік, балалар омбудсменіне сайлау жыл сайын өткізіледі.
