«АМАNAT» партиясында ел игілігі жолындағы бірқатар партиялық жобалар бар. Бұл жобалардың барлығы халыққа қызмет жасайтын, жастардың тәрбиесіне ықпал ететін бірден-бір тиімді жобалар. Сол жобалардың бірінде біз бас қосып отырмыз. Биылғы жыл еліміз үшін өткен жылдағылардай атаулы даталарға толы
«AMANAT» партиясы Еңбекші аудандық филиалының ұйымдастыруымен «Ұлттық мұра» партиялық жобасы аясында “Ата-ананы құрметтеу-әрбір адамның борышы” атты тақырыпта кездесу өтті, деп хабарлайды R-factor.kz ақпарат агенттігі.
Дана халқымыз «Ата-анаңа не қылсаң, алдыңа сол келер» деген. Ата-анаға құрмет көрсету – асыл парызымыз. Ата-ана – әрбір адамның қайтып соғар қазығы. Оған деген сүйіспеншілік тек жүректен шығуы тиіс. Әсіресе, мейірімнің кәусар бұлағы – Ана есіміне қатыссыз дүниеде ештеңе жоқ. Халқымыздың ұғымында баланың ата-ана алдындағы парызын өтеуі «Ана сүтін ақтау» деп аталады. «Әкеге бағыну – тәңірге бағыну» деп әкені де қадір тұтқан. Ендеше адам өмірінің мәні мен сұлулығы, адамның болашағына деген сенімділігі – баланың ата-анасын қадір тұтып, өзінің перзенттік парызын бір сәтке де есінен шығармауында жатыр.
Әрқайсымыз үшін дүниедегі ең қымбат жандар ата-анамыз болуға тиіс. Олардан жақын адамдар бұл өмірде табыла қоймас. Өйткені, олар біздің туған кезімізден бастап жанымызда жүріп, қамқорлық жасап, қолындағы барын бізге береді. Оған қоса балаларым аш, қатарынан қалмасын деп «ішейін деп отырған астарын» біздерге сақтап отыратыны бәрімізге белгілі. Сондықтан ата-ананың алдындағы борышты өтеу өте қиынға түседі деп ойлаймын. Туған анамызды әлемдегі мұсылмандар зиярат қылатын Мекке, Мединеге үш рет арқалап алып барсақ та, анамыздың алдындағы борышымызды ақтай алмаймыз, анамыздың бізді тербетіп, бір түн ұйықтамаған кезіндегі борышынан ғана құтылады екенбіз. Себебі, олардың бізге сыйлаған баға жетпес сыйы – өмір. Сондықтан, ата-анаға не істесең, алдыңа өзіңнің балаларыңнан қайтады. Дүние кезек деген осы. Біз өмір бойы жас болып тұрмаймыз. Біз ата-анамызды сыйласақ, біздің балаларымыз да қартайған шағымызда өзімізді күтіп-баптап, бағып-қағатын болады.
«Ұлттық мұра» партиялық жобасы халқымыздың ата- анамызды құрметтеу, сыйлау, бағалау және бар кезде қадірін білу керек екенін дәріптеді. Ата- анамыз біздің өміріміздің мәні, ата-ана – бізге өмір сыйлаған,отбасының негізгі діңгегі, бастапқы дәнекері. Дәстүрлі Қазақ отбасында ата -ананы қадірлеу керектігі ерекше әспеттелгені айтылды. Жиын соңында іс-шараға қатысушылармен пікір алмасулар, талқылаулар болды.