Түркістан қаласының прокуроры Жаннұр Ахметбек қалалық полиция басқармасының тергеушілері мен анықтаушыларының
өндірісіндегі қылмыстық істерді тергеу барысы туралы есептерін тыңдады.
Жалпы а.ж. 5 айында қала аумағында қылмыстылық 24% төмендеген (520-дан 395-ке). Осы кезеңде басқарманың өндірісінде 447 іс болса, 209 іс аяқталған, оның ішінде 170 сотқа жолданған, 39 ақталмайтын негіздермен тоқтатылған. Прокурорлар 79 іс бойынша жазбаша нұсқау берген, 40 заңсыз процестік шешімнің күші жойылған, прокурорлық қадағалау актілерімен 14 қызметкер тәртіптік жауаптылыққа тартылған.
Жиналыста тергеушілер мен анықтаушыларға жекелеген қылмыстық істер бойынша бағыт-бағдар беріліп, нақты тергеу әрекеттерін жүргізу тапсырылды. Қала прокуроры бірқатар созбалаңдыққа салынған істерді атап өтіп, түпкілікті шешім қабылдауды талап етті.
Сондай-ақ статистикалық деректердің шынайылығын қамтамасыз етіп, бұрмалауға жол бермеу жөнінде атап өтілді.
Бұдан бөлек, сотқа дейінгі тергеп-тексеруді бастаудың заңдылығы, тергеу мерзімін сақтау, бұлтартпау шараларын қолдану, іске қатысушылардың шағымдары мен өтінішхаттарын қарау мәселелері талқыланып, тергеу және анықтау бөлімдерінің басшыларынан бақылауды күшейту ескертілді.
