Мемлекет басшысы Жолдауында цифрлық технологияларды дамыту, жасанды интеллект мүмкіндіктерін пайдалану және мемлекеттік басқару жүйесін жаңғырту мәселелеріне ерекше назар аударды. Бұл бағыт өңірлердің бәсекеге қабілеттілігін арттыруда маңызды рөл атқарады.
Түркістан облысында да цифрлық инфрақұрылымды дамыту жұмыстары кезең-кезеңімен жүргізілуде. Мемлекеттік қызметтерді электронды форматқа көшіру, білім беру ұйымдарын цифрлық жүйелермен қамтамасыз ету, ауылдық елді мекендерге интернет тарту бағытында нақты шаралар қолға алынған.
Цифрландырудың тиімділігі тұрғындардың күнделікті өмірінен көрінуі керек. Мәселен, ауыл тұрғыны мемлекеттік қызмет алу үшін аудан орталығына бармай-ақ, қажетті құжаттарды онлайн рәсімдей алуы тиіс. Сол сияқты білім беру мен медицина саласындағы цифрлық шешімдер де қызмет сапасын арттыруға мүмкіндік береді.
Алдағы уақытта жасанды интеллектіні ауыл шаруашылығы, су ресурстарын басқару, қоғамдық қауіпсіздік және өңірлік жоспарлау салаларына енгізудің әлеуеті зор.
Цифрлық даму – тек технологиялық жаңару емес, ол халықтың уақытын үнемдеп, мемлекеттік қызметтердің қолжетімділігін арттыратын маңызды құрал.