Қоршаған ортаны қорғау, экологиялық мәдениетті қалыптастыру және жастарды қоғамға пайдалы еңбекке баулу — мемлекеттік жастар саясатының маңызды бағыттарының бірі. Мемлекет басшысының бастамасымен қолға алынған «Таза Қазақстан» республикалық экологиялық акциясы аясында Түркістан қаласында кезекті ауқымды абаттандыру мен тазалық сенбілігі ұйымдастырылды.
Бұл экологиялық бастаманың басты ерекшелігі — тазалық акциясына Түркістан қалалық Жастар ресурстық орталығының қызметкерлерімен бірге пробация есебінде тұратын жастардың белсене қатысуында болды. Шараның негізгі мақсаты — туған жердің табиғатын аялау, қала мен оған қарасты елді мекендердің тазалығын сақтаумен қатар, қиын өмірлік жағдайға тап болған немесе заң бұзушылық жасап, есепте тұрған жастарды қоғамдық пайдалы іске тарту, оларды қайта әлеуметтендіру және бойларында азаматтық жауапкершілікті қалыптастыру болып табылады.
Сенбілік барысында белсенді жастар мен пробация есебіндегі азаматтар бір жеңнен қол, бір жағадан бас шығарып, бөлінген аумақтарды тұрмыстық қалдықтардан, күрес-қоқыстардан тазартты. Сондай-ақ, ағаштардың түбін әктеу, қураған бұталарды отау, гүлзарлар мен саябақтардың маңайын ретке келтіру және абаттандыру жұмыстары жоғары ұйымшылдықпен жүргізілді. Бірлескен еңбек барысында жастар арасында бауырмалдық пен достық орта қалыптасып, өзара сенімділік артты.
Тазалық акциясы тек физикалық еңбекпен шектеліп қалған жоқ. Шара барысында Жастар ресурстық орталығының мамандары мен психологтары пробация есебіндегі жастармен бейресми жағдайда сұхбаттасып, олардың қоғамда өз орнын табуына, жұмысқа орналасуына немесе кәсіби қайта даярлау курстарынан өтуіне қатысты консультациялық кеңестер берді. Мұндай қолдау олардың қайта қылмыс жолына түспеуіне және заңға бағынатын үлгілі азамат болып қалыптасуына үлкен септігін тигізеді.
Таза орта мен таза табиғат — бұл әрбір азаматтың ортақ жауапкершілігі. Еліміздің рухани астанасы саналатын Түркістан шаһарының тазалығы мен көркейе түсуіне әрбір тұрғын мен жас буынның қосар үлесі орасан зор. Бірлікпен, ауызбіршілікпен атқарылған әрбір игі іс – туған жерге деген шынайы жанашырлық пен отансүйгіштіктің жарқын көрінісі болып табылады. Мұндай шаралар жастардың бойында «Адал азамат» ұғымын қалыптастырып, еңбекқорлық пен тазалықты өмірлік ұстанымға айналдыруға мүмкіндік береді.
Түркістан қалалық Жастар ресурстық орталығының өкілдері атап өткендей, пробация есебіндегі жастарды қоғамдық-мәдени, экологиялық және спорттық іс-шараларға тарту бағытындағы кешенді жұмыстар жүйелі түрде жалғасады. «Таза Қазақстан – Таза аймақ» акциясы шеңберіндегі сенбіліктер мен абаттандыру жобалары шаһар аумағында алдағы уақытта да тұрақты түрде өткізіліп тұрмақ.