Бүгінгі таңда өскелең ұрпақтың құқықтық сауаттылығын арттыру, жастар арасындағы қылмыс пен құқық бұзушылықтың алдын алу — мемлекеттік жастар саясатының ең басты әрі стратегиялық басымдықтарының бірі болып табылады. Осы бағытта Түркістан қаласында жастардың құқықтық мәдениет деңгейін анықтау, олардың заң талаптарын сақтау жауапкершілігін бағалау және қоғамдағы өзекті мәселелерге қатысты көзқарасын білу мақсатында ауқымды социологиялық сауалнама жүргізілді.
Өңірдегі жастар саясатын тиімді жүзеге асыру және жастар ортасындағы заңбузушылықтардың түпкі себептерін анықтауды көздеген бұл зерттеуге қаладағы жоғары және арнаулы орта оқу орындарының студенттері, белсенді жастар мен түрлі сала өкілдері қатысты. Сауалнама барысында қатысушылар өздерін толғандырып жүрген мәселелерді ашық айтып, заңнамалық шеңбердегі қауіпсіздікті қамтамасыз ету бойынша өз пікірлерімен және ұсыныстарымен бөлісті.
Зерттеу жұмысы бірнеше негізгі блоктарды қамтыды. Атап айтқанда, сауалнама сұрақтары жастар арасындағы құқық бұзушылықтың туындау себептеріне, құқық қорғау органдарына болған сенім деңгейіне, буллинг пен лудомания секілді заманауи қауіп-қатерлердің таралу масштабына және қауіпсіз қоғам қалыптастырудағы жастардың жеке жауапкершілігіне бағытталды. Қатысушылардың басым бөлігі құқық бұзушылықтың басты себептері ретінде бос уақыттың тиімсіз ұйымдастырылуын, құқықтық ақпараттың жеткіліксіздігін және әлеуметтік-психологиялық факторларды атап өтті.
Сонымен бірге, сауалнамаға қатысқан Түркістан жастары қаладағы қоғамдық тәртіпті сақтау мен қауіпсіз ортаны құруда өздерінің де белсенділік танытуға дайын екендіктерін білдірді. Олардың пікірінше, мұндай алдын алу жұмыстары тек жазалау немесе шектеу шараларымен шектелмей, ең алдымен түсіндірме, ағартушылық және профилактикалық сипатта жүргізілуі тиіс.
Алынған сауалнама нәтижелері мен талдау мәліметтері алдағы уақытта жастармен жүргізілетін профилактикалық жұмыстарды жүйелі түрде жетілдіруге негіз болады. Түркістан қалалық жастар саясаты басқармасы мен тиісті құқық қорғау құрылымдары бұл мәліметтерді жастардың құқықтық мәдениетін арттыруға бағытталған жаңа іс-шаралар жоспарын құруда, сондай-ақ заңсыздықтардың алдын алу механизмін қайта қарау барысында ескеретін болады.
Жалпы алғанда, мұндай зерттеулер жастар мен мемлекеттік органдар арасындағы ашық диалогты қалыптастыруға зор септігін тигізеді. Түркістан қаласында жастардың құқықтық сауаттылығын шыңдау, оларды заңға бағынатын, жауапкершілігі жоғары азамат ретінде қалыптастыру бағытындағы ақпараттық-түсіндіру және профилактикалық жұмыстар бұдан былай да жүйелі түрде жалғасады. Жас ұрпақтың заңға деген құрметі — тұрақты әрі қауіпсіз қоғамның берік кепілі.