Қоршаған ортаны қорғау, қала аумағын көркейту-көгалдандыру және жас ұрпақтың бойында жоғары экологиялық мәдениетті қалыптастыру – мемлекеттік жастар саясатының басты басымдықтарының бірі. Бүгінде еліміздің рухани астанасы – Түркістан қаласында «Жасыл ел» жастар еңбек жасақтарының маусымдық жұмыстары жоғары қарқынмен жүзеге асырылып жатыр. Аталған жоба жас өрендерді еңбекқорлыққа тәрбиелеп қана қоймай, олардың бойында туған жерге деген сүйіспеншілік пен туған қаланың тазалығына деген жанашырлық сезімді ұялатады.
Түркістан қалалық Жастар ресурстық орталығының ұйымдастыруымен «Жасыл ел» еңбек жасақтарының мүшелері шаһар аумағын тазарту және абаттандыру бағытындағы жұмыстарын жүйелі түрде жалғастыруда. Жоба аясында жасақ сарбаздары белгіленген кестеге сәйкес қаланың қоғамдық орындарында, саябақтарда, көше бойлары мен мекеме маңайларында тазалық акцияларын ұйымдастырып келеді.
Кезекті тазалық шарасы Жастар ресурстық орталығы ғимаратының аумағында өтті. «Жасыл ел» жасақтарының белсенді сарбаздары жұмыла еңбек етіп, орталық ғимаратының айналасын тұрмыстық қоқыстардан, қурайлар мен шөп-шаламдардан тазартты. Сондай-ақ, жастар гүлзарлар мен ағаш түптерін ретке келтіріп, айналаны абаттандыруға өздерінің елеулі үлестерін қосты. Өздері күнделікті бас қосатын, түрлі игі жобалар талқыланатын Жастар ресурстық орталығының айналасын тап-таза етіп ұстау – сарбаздар үшін ерекше жауапкершілік әрі мақтаныш.
Жастар ресурстық орталығының өкілдері атап өткендей, «Жасыл ел» бағдарламасы – бұл жай ғана тазалық акциясы емес. Бұл – жастарды бірлікке, ұйымшылдыққа және қоғамдық пайдалы еңбекке жұмылдыратын ауқымды әлеуметтік қозғалыс. Сарбаздар жазғы демалыс уақытын тиімді пайдаланып, алғашқы еңбек тәжірибесін жинақтайды, адал еңбекпен табылған табыстың қадірін түсінеді. Мұнымен қоса, олар өз қаласының тазалығына тікелей атсалысу арқылы тұрғындар мен замандастарына оң үлгі көрсетеді.
Жасақ сарбаздары «Таза орта – жарқын болашақтың кепілі!» деген ұранды ту етіп, тұрғындарды қоршаған ортаны аялауға, қоқысты бей-берекет тастамауға және тазалық сақтау мәдениетін ұстануға шақырады. Жастардың мұндай белсенділігі шаһар тұрғындары тарапынан да оң бағаланып, қолдау табуда.
Мемлекет басшысының бастамасымен қолға алынған «Таза Қазақстан» жалпыұлттық экологиялық акциясы аясында Түркістан қаласында «Жасыл ел» еңбек жасақтарының қатысуымен жүргізілетін мұндай абаттандыру мен тазалық жұмыстары маусым соңына дейін тұрақты түрде өз жалғасын табатын болады.