2025 жылдың 18 желтоқсанында Ордабасы ауданының аумағында «Ордабасы-Антитеррор-2025» терроризмге қарсы жедел оқу-жаттығулары ұйымдастырылды. Бұл іс-шараның негізгі мақсаты – аудандық жедел штаб мүшелері мен жедел топтардың терроризмге қарсы күрес жөніндегі практикалық дағдыларын жетілдіру, іс жүзіндегі әрекеттерін пысықтау және іскерліктерін арттыру болып табылады.
Оқу-жаттығу барысында жедел штабтың күштері мен құралдары террористік акт орын алған жерге хабарлау, зардап шеккендерді жинау және жеткізу жүйесінің элементтерін тексеру бойынша практикалық жұмыстар атқарылады. Сонымен қатар, төтенше жағдайларға жедел әрекет ету, қауіпсіздік шараларын ұйымдастыру және тұрғындарды қорғау бағытындағы іс-қимылдары тексеріледі.
Бұл оқу-жаттығулар тұрғындардың қауіпсіздігін қамтамасыз етуге, терроризмге қарсы күреске қатысатын мемлекеттік органдар мен жеке құрамның дайындық деңгейін арттыруға бағытталған. Іс-шара барысында барлық қатысушылардың кәсіби деңгейі мен әрекеттері бағаланып, тәжірибелік нәтижелер бойынша ұсыныстар жасалады.
Ордабасы ауданы әкімдігі тұрғындарды аталған оқу-жаттығуға түсіністікпен қарауға шақырады. Қолайсыздықтар мен уақытша шектеулер үшін кешірім сұрап, бұл шараның азаматтардың қауіпсіздігі мен қоғамдық тәртіпті сақтау үшін қажетті екенін атап өтті.
Оқу-жаттығулар тұрғындар үшін алдын ала ақпарат беруді, қоғамдық қауіпсіздікті қамтамасыз етуді және терроризмге қарсы күрес іс-шараларын үйлестіруді күшейтуді мақсат етеді. Мұндай іс-шаралар қоғамда жауаптылық пен бірлікті нығайтуға, жергілікті тұрғындардың сенімін арттыруға бағытталған маңызды қадам болып табылады.