Қазақстанда «Жұмысшы мамандықтар жылы» деп жарияланып, мемлекет еңбек адамының мәртебесін көтеруге ерекше назар аударып келеді. Ел Президенті Қасым-Жомарт Тоқаев өзінің Жолдауында: «Ел экономикасының негізін құрайтын – қолымен іс тындыратын, күнделікті өмірді қамтамасыз етіп жүрген қарапайым жұмысшылар. Еңбек адамы әрдайым құрметке лайық» деген еді. Бұл сөздер бүгінгі қоғамдағы еңбектің, жауапкершіліктің және кәсіби шеберліктің маңыздылығын нақты көрсетеді.
Осы еңбек майталмандарының қатарында Оңтүстік жарық транзит мекемесінің тәжірибелі электр маманы Дархан Сыздықов бар. Ол 2007 жылдан бері жарық беру саласында үздіксіз еңбек етуде. Алғашында контролер болып қызметке кірген Дархан уақыт өте келе өз біліктілігі мен жауапкершілігінің арқасында апаттық қызметтің маманына айналды. Оның күнделікті жұмысының басты бөлігі – тұрғындардың жарықсыз қалмауын қамтамасыз ету, кез келген ақауды дер кезінде анықтап, қалпына келтіру.
Шын мәнінде, электр мамандарының жұмысы өте жауапты әрі тәуекелді салаға жатады. Бір сәттік қателік немесе немқұрайлылық адам өміріне қауіп төндіруі мүмкін. Сондықтан қауіпсіздік техникасын қатаң сақтау – осы саланың басты талабы. Дархан Сыздықов та осы ережелерді мүлтіксіз орындап, жылдар бойы талай апатты жағдайдың алдын алды. Тұрғындардың жарықсыз қалмауы үшін ол күндіз-түні еңбек етіп, кез келген апатқа дер кезінде әрекет етеді.
Электр жүйесінің қызметкерлері көбіне тасада жүретін, еңбегі көп жағдайда көзге көрінбейтін мамандардың бірі. Олардың еңбегі қала мен елді мекендердің тұрақты жұмысына тікелей әсер етеді. Қарапайым тұрғындар үшін жарықтың болуы – күнделікті өмірдің, қауіпсіздік пен жайлылықтың кепілі, ал осы жайлылықты қамтамасыз ететін мамандар – еңбегі бағаланбай қалуы мүмкін тұлғалар. Сондықтан «Жұмысшы мамандықтар жылы» аясында мұндай мамандардың еңбегі дәріптеліп, қоғам назарында болуға тиіс.
Дархан Сыздықов сияқты мамандардың тәжірибесі мен кәсібилігі – тек жарық жүйесінің ғана емес, елдің әлеуметтік тұрақтылығы мен қауіпсіздігінің де кепілі. Ол жұмысқа жауапкершілікпен қарап қана қоймай, әріптестеріне үлгі болып, саладағы жастарды үйрету мен кәсіби шеберлігін арттыруға да үлес қосуда. Бұл – еңбек адамының қоғам алдындағы басты міндетінің бірі.
Еңбек адамы – елдің тірегі. Олар қоғамның тыныштығын, инфрақұрылымның дұрыс жұмысын қамтамасыз етеді. Осындай азаматтардың қажырлы еңбегі мен кәсібіне деген адалдығы қоғамның дамуына жол ашады, адамдардың өмір сапасын арттырады. Қарапайым жұмысшылардың еңбегі дәріптеліп, олардың жетістіктері насихатталса, бұл жастардың да еңбексүйгіштікке, адалдыққа және жауапкершілікке тәрбиеленуіне ықпал етеді.
Қазіргі таңда Қазақстанда осындай мамандарға деген құрметті арттыру, олардың мәртебесін көтеру және еңбегін бағалау бағытында бірқатар әлеуметтік бастамалар жүзеге асырылуда. Жұмысшы мамандар үшін кәсіби біліктілікті арттыру, еңбек қауіпсіздігін қамтамасыз ету, әлеуметтік қолдау көрсету – мемлекет тарапынан берілген басты басымдықтар қатарында. Мұның бәрі еңбек адамына деген құрмет пен сенімділікті арттыруға бағытталған.
Қарапайым жұмысшылардың еңбегі – елдің экономикасы мен әлеуметтік дамуының негізі. Дархан сынды мамандардың күнделікті қажырлы еңбегі – қаланың жарығы, тұрғындардың қауіпсіздігі, тұрақтылығы мен жайлылығының кепілі. Еңбек адамы әрдайым құрметке лайық, олардың еңбегі дәріптеліп, қоғамда көрініс табуы тиіс. Осылайша, ел экономикасының тұрақты дамуы, әлеуметтік инфрақұрылымның нығаюы және азаматтардың өмір сапасының артуы – еңбек адамдарының еңбегімен тығыз байланысты.