Түркістан облысы, Ордабасы ауданы, Темірлан ауылында балалар мен жасөспірімдердің шығармашылық қабілетін дамытуға арналған жаңа «Өнер мектебі» пайдалануға берілді. Жаңа нысанның ашылу салтанатына Қазақстан Республикасының Бас прокурорының орынбасары Ғабит Садырбеков, Түркістан облысы әкімінің бірінші орынбасары Зұлпыхар Жолдасов, аудан әкімінің өкілдері, ұстаздар мен оқушылар қатысты.
Салтанатты шарада құттықтау сөз сөйлеген Ғабит Садырбеков жаңа нысанның ашылуы өңірде мәдени және білім беру саласының дамуына маңызды серпін беретініне тоқталды. Ол балаларға және жасөспірімдерге заманауи мүмкіндіктер жасау арқылы олардың шығармашылық қабілетін шыңдауға жол ашылатынын атап өтті. Сонымен қатар, жаңа мектептің құрылыс сапасы мен заманауи инфрақұрылымының жоғары деңгейде жасалғанын айтты.
Түркістан облысы әкімінің бірінші орынбасары Зұлпыхар Жолдасов өз сөзінде мемлекетке қайтарылған активтердің ел игілігіне тиімді жұмсалғанын ерекше атап өтті. Ол: «Бұл жаңа өнер мектебі Ордабасы ауданындағы балалар мен жасөспірімдердің рухани дамуына үлкен серпін береді. Құрылыс мемлекетке қайтарылған активтер есебінен қаржыландырылып, 870 миллион теңгеден астам қаражат халықтың игілігіне бағытталды. Бұл Президентіміз Қасым-Жомарт Тоқаевтың «Қайтарылған әрбір актив ел игілігіне жұмсалуы тиіс» деген ұстанымының нақты іске асуы болып табылады», – деді.
Жобаның құрылыс жұмыстары 2025 жылдың сәуір айында басталып, желтоқсан айында толық аяқталды. 300 орындық «Өнер мектебі» жаңа оқушыларға заманауи жағдай жасалған үлкен оқу ғимараты ретінде бой көтерді. Мұнда музыкалық білім беретін арнайы кабинеттер, топтық жаттығу залдары, ұлттық және шетелдік аспаптар сабақтарына арналған бөлмелер, сондай-ақ музыкалық аспаптар бөлмесі бар. Екінші қабатында дыбыс жазу студиясы, хор үйірмесі, музыкалық үйірмелер, сахна және сахналық жабдықтар қоймасы орналасқан.
Сонымен қатар, 150 орындық мәдени шаралар залы, кітапхана, әртүрлі музыкалық аспаптар сабақтарына арналған бөлмелер балалардың шығармашылық қабілетін дамытуға барлық жағдайды қамтамасыз етеді. Бұл жаңа нысан бұрынғы ескі, апатты жағдайдағы мектептің орнын басып, білім алушылар мен ұстаздардың қауіпсіз әрі жайлы жағдайда білім алуына мүмкіндік берді.
Өткенде ескі ғимаратта 400-ден астам бала білім алып, бұл көрсеткіш оның жобалық қуатынан бірнеше есе асып кеткен еді. Мұғалімдер тар, суық, ескірген бөлмелерде жұмыс істеп келген. Енді бұл мәселе толық шешіліп, балалар мен ұстаздардың жұмыс және оқу жағдайы заманауи стандарттарға сәйкес келтірілді.
Жаңа мектептің ашылуы тек білім беру саласының емес, ауданның мәдени өмірін жаңғыртуға да үлкен ықпал етеді. Балалар музыка, хореография және басқа да шығармашылық бағыттарда жаңа мүмкіндіктерге қол жеткізіп, өз таланттарын толық шыңдай алады. Бұл – мемлекетке қайтарылған активтердің қоғам үшін нақты пайдаға айналуының жарқын мысалы.
Сонымен қатар, елімізде заңсыз иемденілген активтерді мемлекет меншігіне қайтару жұмыстары жалғасуда. Мемлекет басшысының тапсырмасы бойынша бұл қаражат өңірдегі жүздеген әлеуметтік нысан құрылысы мен жаңғырту жұмыстарына бағытталған. Түркістан облысында осы қор есебінен 30-ға жуық нысан мен жоба қаржыландырылуда. Олардың ішінде елді мекендерді сапалы ауыз сумен қамтамасыз ету, медициналық мекемелерді күрделі жөндеуден өткізу және басқа да әлеуметтік маңызы бар жобалар бар.
Жаңа «Өнер мектебі» ашылуының айрықша мәні – бұл тек білім мен мәдениетті дамыту ғана емес, сонымен қатар мемлекеттік саясаттың тиімді жүзеге асырылуын көрсететін нақты іс. Мемлекетке қайтарылған активтердің халық игілігіне жұмсалуы – Президент тапсырмасының айқын көрінісі, әрі Ордабасы ауданындағы жастар мен балалардың дамуына берілген нақты мүмкіндік болып табылады.
Салтанатты шара барысында қатысушылар жаңа нысанды аралап, мектептің барлық заманауи мүмкіндіктерімен танысты. Аудандағы мәдениет пен білім саласындағы жаңа жоба мектеп оқушыларының өнерге деген қызығушылығын арттырып, шығармашылық қабілеттерін дамытуға үлкен ықпал етеді деп күтілуде.
Жаңа білім нысаны Ордабасы ауданының дамуындағы маңызды қадам болып, әлеуметтік инфрақұрылымды нығайтуға, білім мен мәдениет саласының сапасын арттыруға және жастардың шығармашылық қабілеттерін дамытуға бағытталған мемлекеттік саясатты жүзеге асыруда үлгілі бастама ретінде бағаланады.