Созақ ауданында мемлекеттік органдардың қызметін ақпараттық қолдап отыру және халыққа түсіндіру жұмыстары жүйелі түрде жүргізілуде. Осы бағыттағы шаралардың негізгі мақсаты – азаматтарды мемлекеттік шешімдер қабылдауға, бағдарламалар мен бастамаларды іске асыруға қатысуға ынталандыру, сондай-ақ экологиялық мәдениетті қалыптастыру.
2025 жылдың соңында Президент Қасым-Жомарт Тоқаев ауыл әкімдерінің диалог-платформасында сөйлеп, әкімдердің негізгі функцияларын атап өтті. Мемлекет басшысының сөзіне сәйкес, әкім – ең алдымен, халықпен тікелей жұмыс істейтін мемлекеттік қызметші. Ауыл әкімдері өз округтерінің жағдайын терең түсінуі, тұрғындардың күнделікті мәселелерін шешуге белсенді қатысуы тиіс. Бұл бағыттағы диалог-платформалар арқылы атқарушы билік пен қоғам арасындағы байланыс күшейіп, ұсыныстар мен ой-пікірлер жұмыс барысында ескеріледі.
Экологиялық бағыттағы жұмыстар да мемлекет саясатының басты құрамдас бөлігіне айналды. Премьер-министрдің тапсырмасымен тұрмыстық қатты қалдықтар полигонындағы кемшіліктер жойылып, заңсыз қоқыс алаңдарын жабу жұмыстары жеделдетілуде. Биыл шамамен 6,5 млн қазақстандық экологиялық акцияларға қатысты. Бұл халық арасында экологиялық мәдениет қалыптастыруға бағытталған ақпараттық жұмыс тиімді жүргізіліп жатқанын көрсетеді.
Экологиялық білім беру саласында да белсенді шаралар жүзеге асырылуда. «Адал азамат» бағдарламасы арқылы оқушылар бойына еңбекқорлық, отансүйгіштік және экологиялық жауапкершілік құндылықтары сіңірілуде. Қазіргі таңда оқушылардың 87,2%-ы қосымша экологиялық біліммен қамтылған, ал 35 жоғары оқу орнында экология саласы бойынша мамандар дайындалуда. 2025–2026 оқу жылына «Қоршаған орта» бағыты бойынша 2358 мемлекеттік грант бөлінген. Сонымен қатар, студенттер арасында еріктілік белсенді дамып келеді, олардың қатысу көрсеткіші 45%-ға жетіп отыр, бұл қоғамдағы жауапкершілік пен белсенділікті арттыруға септігін тигізуде.
Өңірлерде орман шаруашылығы мен ағаш отырғызу жұмыстары да жүйелі жүргізілуде. 2021–2025 жылдар аралығында республикада жалпы ауданы 918,4 мың гектар жерге 1 млрд 470 млн ағаш егілді, оның ішінде биыл 320 млн көшет отырғызылды. «Семей орманы» тәлімбақтары тәжірибесі бойынша көшеттердің өмір сүру деңгейі 90%-ға жетеді. Сонымен қатар, Арал теңізінің құрғаған түбінде табиғи экожүйелерді қалпына келтіру жобалары іске асырылуда: Қазалы қаласында қуаттылығы 3 млн данаға дейін сексеуіл көшеттері бар тәлімбақ салынды. Жаңа жобалар алдағы жылдары да жалғасып, «Арал Орманы» резерватын құру арқылы табиғи экожүйелерді қалпына келтіру жұмыстары кеңейтіледі.
Жоғары оқу орындарында да экологиялық бағыттағы кадрлар даярлау, инженерлік экология және экоаналитика саласындағы білім беру бағдарламалары жаңартылуда. 2025–2027 жылдарға арналған ғылыми жобалар шеңберінде «Экология, қоршаған ортаны қорғау және табиғи ресурстарды тиімді пайдалану» бағыты бойынша 318 жоба іске асырылмақ. Бұл шаралар жастардың кәсіби дамуы мен экологиялық сана қалыптастыруға үлкен үлес қосады.
Премьер-министрдің басшылығымен «Таза Қазақстан» бастамасын жүзеге асыру барысына мониторинг жүргізу орталығы құрылды. Бұл орталық жауапты мемлекеттік органдардың жұмысын бақылап, ай сайын есеп беріп отыруға мүмкіндік береді. Сонымен қатар, азаматтарға бағдарламалардың мәні мен нәтижесі түсіндіріліп, олардың белсенді қатысуы қамтамасыз етіледі. Осылайша, Созақ ауданы мысалында мемлекеттік бастамалар мен экологиялық жобаларды ақпараттық қолдау – қоғамның құқықтық және экологиялық мәдениетін арттыруға, азаматтардың белсенділігін нығайтуға бағытталған маңызды іс-шара болып отыр.