Ордабасы ауданында ауыл шаруашылығы саласы жыл сайын тұрақты дамып келеді. Аудан басшысы атап өткендей, «Біз молшылық пен берекенің, ырыстың мерекесін атап өтудеміз. Президентіміз Қасым-Жомарт Кемелұлының тапсырмасына сай, ауыл шаруашылығын жаңа деңгейге көтеру — біздің басты міндетіміз». Аудандағы жетістіктер — шаруалардың қажырлы еңбегі, дұрыс жоспарлау және бірліктің нәтижесі.
Биыл аудан бойынша 71 600 гектар жерге ауыл шаруашылығы дақылдары егілді, оның ішінде 6 925 гектар жер су үнемдеу технологиясымен өңделді. Бұл су ресурстарын тиімді пайдаланудағы маңызды жетістік болып саналады.
Жылыжай шаруашылығында да оң өзгерістер бар. Мысалы, Шұбарсу ауыл округінде 15 гектар жер телімі бөлініп, 42 шаруаға берілді. Оның 30-ы «Ауыл аманаты» бағдарламасы арқылы қолдау алып, бүгінде 23 азамат алғашқы өнімін жинауда. Осылайша, аудан бойынша жылыжай көлемі 134 гектарға жетті.
Аудан шаруалары 144 дана жаңа техника сатып алып, еңбек өнімділігін арттырды. Нәтижесінде, ауыл шаруашылығы өнімдерінің жалпы көлемі 450 мың тоннаға, жалпы құны 55,9 миллиард теңгеге жетті. Облыс бойынша диқандар 144,5 мың гектарға мақта егіп, 470 мың тонна өнім жинауды жоспарлап отыр. Заманауи технология қолданылған егістік көлемі 1,2 мың гектардан 50 мың гектарға дейін артты. Ауданда 25 зауыт пен 175 қабылдау бекеті шаруаларға қызмет көрсетіп отыр.
Ордабасы ауданында мақта егісі де ұлғайып келеді. Биыл 509 шаруа қожалығы 7 142 гектар алқапқа мақта еккен, бұл өткен жылмен салыстырғанда 742 гектарға көп. Орташа түсім 27 центнерді құрап, жалпы 19,3 мың тонна өнім жиналады деп жоспарланған. Мақтаны өңдеу ісімен «Нұр Агро 73» ЖШС айналысады. Төрткүл ауыл округінде орналасқан кәсіпорын 10 мың тоннаға жуық өнім қабылдаған. Биыл шаруалар мақтаның түрік сорттары – «ВА 1010» және «ВА 440 Лазерді» еккен, ал баға 1 килограмы 270 теңге деңгейінде белгіленді.
Мал шаруашылығында да тұрақты өсім бар. Төрт түліктің жалпы саны 560 мың басқа жетті. Мысалы, Дихан ауылының тұрғыны Ділмұханбет Сәгидіков шалғай елді мекенде орналасқан қорасында кәсібін дамытып келеді. Оның қорасында 45 бас өгіз бар, ол мал басын көбейту бағытында үздіксіз еңбек етіп, өз тәжірибесін жетілдіруде.
Аудандағы «Ауыл аманаты» бағдарламасы да нақты нәтижелер көрсетіп отыр. 2023 жылы бағдарлама аясында 261 азаматқа 1,722 млрд теңге несие берілді, бұл ауыл халқының кірісін арттыруға және шағын әрі орта бизнесті дамытуға бағытталған маңызды қадам болды. 2024 жылы қайтарылған қаражат есебінен 29 жоба 152,2 млн теңгеге қаржыландырылды, оның ішінде мал шаруашылығына 110,5 млн, өсімдік шаруашылығына 44 млн, техника сатып алуға 18,4 млн, ал балық шаруашылығына 8,5 млн теңге жұмсалды.
Сонымен қатар, 2024 жылы 4 ауыл шаруашылығы өндірістік кооперативі құрылды, бұл жеке шаруашылықтардың бірігіп жұмыс істеуіне, техникалық базаны жақсартуға және нарыққа шығуға мүмкіндік берді. Қаржыландырылған кооперативтер: Шұбарсудағы «Алан Нұр» (29 млн теңге), Төрткүлдегі «Төрткүл – Құс» (22 млн теңге), Бөгендегі «Бөген 2030» (20 млн теңге) және Қажымұхандағы «Ақбөпе Агро».
Ауданның негізгі әлеуметтік-экономикалық көрсеткіштері де оң динамиканы көрсетеді. Халық саны 133 мың адамға жеткен (тәуелсіздік жылдарында 77 мың), аудан бюджеті 20 млрд теңге, ал инвестиция көлемі 11,2 млрд теңге. Ауыл шаруашылығы өнімінің жалпы құны 77 млрд теңгеге жетті. 7 283 гектар жерге су үнемдеу технологиясы енгізіліп, техника 60 пайызға жаңартылды.
Инфрақұрылым жағынан да оң өзгерістер бар: ауыз сумен қамту деңгейі 100 пайызға, табиғи газбен қамту 77 пайызға жетті. Ауданда 78 мектеп, 61 балабақша және 181 спорт нысаны халық игілігіне қызмет көрсетуде.
Ордабасы ауданында ауыл шаруашылығының дамуы мен халықтың әл-ауқаты жыл сайын артып келеді. Аудандағы қолдаулар, жаңа технологиялар, қаржылай инвестициялар және шаруа еңбегі бірлесе отырып, агроөнеркәсіп саласының тұрақты дамуына жол ашуда.