Ордабасы ауданында ауыл инфрақұрылымын жаңғырту, агроөнеркәсіп кешенін дамыту және ауылдық аумақтардың әлеуметтік-экономикалық әлеуетін арттыру бағытындағы жұмыстар жүйелі түрде атқарылып келеді. Ауданның ауыл шаруашылығына бейімді табиғи мүмкіндіктері мен еңбекқор халқы бұл саланың тұрақты дамуына берік негіз қалыптастырып отыр. Соңғы жылдары мемлекет тарапынан ауылды қолдау бағытындағы реформалар мен бағдарламалардың аясында Ордабасы ауданы да жаңа серпінге ие болды. Ауылдық жерлердегі жағдайды жақсартуға арналған жобалар кезең-кезеңімен орындалуда.
Ауданда су жүйелерін реттеу, мал және егін шаруашылығын қолдау, ауыл ішіндегі жолдарды жөндеу, интернет желісін жүргізу, әлеуметтік нысандарды жаңарту бойынша айтарлықтай жұмыстар атқарылып жатыр. Бұл бастамалар мемлекеттің ауылды дамытуға қатысты стратегиялық бағытымен үндес. Елдің тұрақты дамуы ауылдың әл-ауқатымен тікелей байланысты екені бүгінде баршаға белгілі. Сондықтан Ордабасы ауданында жүзеге асырылып жатқан әрбір жоба — ұлттық саясаттың нақты көрінісі.
Президент Қасым-Жомарт Тоқаев ауылды дамыту мәселесіне ерекше назар аударатынын бірнеше рет атап өткен болатын. Мемлекет басшысының айтуынша, ауыл — қазақтың тамыры, ел руханияты мен мәдениетінің алтын діңгегі. Осы тұрғыда Президенттің:
«Ауыл – төл өркениетіміздің алтын қазығы. Ауылды өркендету – баршаға ортақ парыз. Мемлекет бұл мәселеге ерекше жауапкершілікпен қарайды. Өздеріңіз білесіздер, 2022 жылы халыққа ұсынған сайлау алдындағы бағдарламада ауыл мәселесіне айрықша назар аудардым. Алғашқы Жарлығым да ауылды дамытуға арналды. Соған сәйкес Қазақстан Республикасының ауылдық аумақтарын дамытудың 2023–2027 жылдарға арналған тұжырымдамасы әзірленді. Қазіргі таңда осы құжатқа сай нақты жұмыс атқарылып жатыр», – деген сөзі ауылды дамытуға деген мемлекеттік ұстанымның нақты айғағы болып табылады.
Бұл Тұжырымдама ауылдық аумақтардың әлеуметтік жағдайын жақсартуды, инженерлік инфрақұрылымды жаңартуды, ауыл жастарының білім алу және жұмысқа орналасу мүмкіндіктерін арттыруды басты мақсат етеді. Сонымен бірге аграрлық секторды заманауи технологиямен қамтамасыз ету, шағын және орта фермерлік шаруашылықтарды қолдау, ауыл кәсіпкерлігін жандандыру да негізгі міндеттердің қатарында.
Жуырда өткен Ауыл еңбеккерлерінің екінші форумында да осы мәселелер кеңінен талқыланды. Президент ауыл шаруашылығы саласында шешімін күткен мәселелерді атап, ауыл аймақтардың даму бағытын нақтылай түсті. Аграрлық секторды қолдау — стратегиялық міндет екені ерекше айтылды. Бұл — ауыл халқы үшін жаңа мүмкіндіктердің ашылуына жол береді.
Ордабасы ауданында да осы форумда көтерілген басым бағыттар жергілікті деңгейде іске асырылып жатыр. Ауыл шаруашылығына қажетті су арналары қалпына келтірілуде, су үнемдеу технологиялары енгізілуде. Мал шаруашылығына арналған инфрақұрылым жаңартылып, ветеринариялық қауіпсіздік шаралары күшейтілуде. Мемлекеттің қолдау тетіктері арқылы аудан тұрғындары жаңа техникалар мен жабдықтарды лизингке алып, шаруашылықтарын дамытудың тың мүмкіндіктеріне ие болуда.
Сонымен қатар «Ауыл аманаты» бағдарламасы шеңберінде ауыл тұрғындарына төмен пайыздық несие беріліп, отбасылық кәсіпті дамытуға нақты қолдау көрсетілуде. Ауданда бұл бағдарлама арқылы ондаған жоба мақұлданып, ауыл ішінде жаңа жұмыс орындары ашылуда. Бұл бастама ауылдағы табыс көзін арттырып қана қоймай, халықтың өз ауылында еңбек етуіне жағдай жасайды.
Ауыл инфрақұрылымын жақсарту бағытында да көптеген жұмыстар жалғасуда. Жергілікті елді мекендерде әлеуметтік нысандар жөнделіп, ауызсу жүйелері жаңартылуда, көшелер жарықтандырылып, ішкі жолдар кезең-кезеңімен ретке келтірілуде. Бұл жұмыстың барлығы ауыл тұрғындарының өмір сапасын арттыруға бағытталған.
Президент атап өткендей, ауыл — елдің стратегиялық дамуында шешуші орын алатын негізгі фактор. Сондықтан Ордабасы ауданында ауылдық аумақтарды дамыту ісі күн тәртібінен түскен емес. Жергілікті билік пен ауыл тұрғындарының бірлескен еңбегі, мемлекеттік бағдарламалардың тиімді іске асуы аудандағы ауылдардың жаңа деңгейге көтерілуіне ықпал етуде.
Ордабасы ауданы алдағы уақытта да ауылды дамытуға бағытталған реформаларды жүйелі түрде жалғастыра береді. Ауыл — ел экономикасының берік тірегі. Оны дамыту — ортақ міндет. Мемлекет басшысы белгілеген ұлттық басымдықтар аясында аудан ауылдарының әлеуетін көтеру жұмысы тұрақты түрде жүргізіле бермек.