«Әділетті Қазақстан» тұжырымдамасының экономикалық бағыты аясында мемлекет салық жүйесін жаңғырту бойынша ауқымды реформаларды жүзеге асырып келеді. Бұл өзгерістер елдегі кәсіпкерлікті дамытып, бизнес жүргізуді барынша жеңілдетуге бағытталған. Ордабасы ауданының тұрғындары мен кәсіпкерлері үшін 2026 жылдан бастап күшіне енетін жаңа Салық кодексінің мазмұнын түсіну аса маңызды. Осыған байланысты өңірде түсіндіру жұмыстары кезең-кезеңімен жүргізіліп, тұрғындарға қажетті ақпарат жеткізіліп жатыр.
Жаңа Салық кодексінің ең басты жаңалығы — шағын бизнеске арналған бірыңғай біріктірілген режимнің енгізілуі. Бұған дейін кәсіпкерлер екі түрлі тәртіпті пайдаланып келген: жеңілдетілген декларация және бөлшек сауда салығы. 2026 жылдан бастап бұл екі режим біріктіріліп, біркелкі, түсінікті әрі ыңғайлы жүйе қолданысқа енеді. Бұл жаңашылдық кәсіпкерлердің құжат толтыруға жұмсайтын уақытын азайтып, салық салу процесін жеңілдетуге мүмкіндік береді.
Бірыңғай режимді шағын кәсіпкерлік субъектілері ғана емес, аудан аумағындағы бірнеше адамды жұмыспен қамтып отырған кәсіпорындар да пайдалана алады. Олардың жылдық кірісі 600 мың АЕК-ке дейін, яғни шамамен 2,4 млрд теңгеге дейін болуы тиіс. Бұдан бөлек, жалдамалы қызметкерлер санына ешқандай шектеу қойылмайды. Бұл Ордабасы ауданындағы дүкен, шеберхана, дәмхана, қызмет көрсету орталықтары сияқты шағын кәсіп иелері үшін айтарлықтай жеңілдік.
Егер кәсіпкердің жылдық кірісі 24 мың АЕК-тен асып кетсе, оның салық салынатын табысы еңбекақы қорына жұмсалған қаражат есебінен азайтылады. Бұл — жалақыны ресми түрде төлеуге ынталандыратын, көлеңкелі еңбектің алдын алатын маңызды қадам. Сонымен бірге, жеңілдетілген режимді қолданатын кәсіпкерлер бұдан былай қосылған құн салығы мен әлеуметтік салықтан босатылады. Бұл шағын кәсіпорындардың шығындарын азайтып, бизнес жүргізудің тиімділігін арттырады.
Жаңа Кодексте өзін-өзі жұмыспен қамтыған азаматтарға арналған айтарлықтай жеңілдік қарастырылған. Олар үшін 4% мөлшерінде бірыңғай минималды төлем енгізіледі. Бұл төлем жеке табыс салығын қамтымайды. Яғни бұл санаттағы азаматтар жеке табыс салығынан толық босатылады. Төлемнің құрамына міндетті зейнетақы жарналары, әлеуметтік аударымдар және міндетті әлеуметтік медициналық сақтандыру жарналары кіреді. Мұндай жеңілдік Ордабасы ауданында жеке кәсіппен айналысатын шаштараздар, такси жүргізушілер, дәнекерлеушілер, ұста-шеберлер, құрылысшылар және басқа да жеке қызмет көрсетушілер үшін өте тиімді.
Жаңа Салық кодексінің тағы бір тиімді тұсы — салық есептілігінің формалары 30%-ға қысқарады. Бұл кәсіпкерлер үшін бюрократиялық жүктемені азайтады. Сондай-ақ декларацияларды автоматты түрде толтыру мүмкіндігі енгізіледі. Кәсіпкердің келісімімен жүйе өзі есеп жүргізіп, декларацияның дайын нұсқасын ұсынады. Бұл әсіресе ауылдық округтерде бизнес жүргізіп отырған азаматтар үшін уақытты үнемдеуге көмектеседі.
2026 жылдан бастап жоспарлы тексерулер толық тоқтатылады. Ал тексерулер тек тәуекелдерді басқару жүйесі негізінде ғана жүргізіледі. Яғни адал жұмыс істейтін кәсіпкерлер артық бақылау немесе жоспарлы инспекцияларға ұшырамайды. Бұл мемлекеттің бизнесті қолдау бағытындағы тағы бір маңызды қадамы.
Осының барлығы «Әділетті Қазақстан» идеясын жүзеге асырудың нақты механизмдері болып табылады. Мақсат — салық салудың ашықтығын күшейту, кәсіпкерлікке қолайлы жағдай жасау, шағын және орта бизнестің дамуына жаңа серпін беру. Экономикалық реформалардың нәтижесінде елдегі кәсіпкерліктің жүгі жеңілдеп, бизнес жүргізу әлдеқайда тиімді болмақ.
Ордабасы ауданының тұрғындары мен кәсіпкерлеріне жаңа Салық кодексінің негізгі ережелерін түсіндіру жұмыстары алдағы айларда жалғасады. Аудандық кәсіпкерлік бөлімі, мемлекеттік кірістер басқармасы және «Атамекен» палатасы тұрғындарға жан-жақты кеңес беруге дайын. Әрбір кәсіпкер өз қызметіне нақты қандай режим тиімді екенін анықтап, жаңа тәртіптерге алдын ала бейімделіп алғаны жөн.
Жаңа салық саясаты — ауданымыздың экономикалық белсенділігін арттырып, шағын кәсіпкерлікке жаңа мүмкіндіктер ашады. Сондықтан Ордабасы өңірі үшін осы өзгерістердің мазмұнын дер кезінде түсініп, дұрыс қолдану – бүгінгі күннің өзекті талабы.