Кентау қаласында тұрғындардың спортпен айналысуына қолайлы жағдай жасау, бұқаралық спортты дамыту және жастарды салауатты өмір салтына баулу бағытындағы жұмыстар қарқынды жалғасуда. Осы мақсатта қалада заманауи талаптарға сай жаңа дене шынықтыру-сауықтыру кешенінің құрылысы басталған болатын. Бүгінде аталған нысанда құрылыс жұмыстары жоспарға сәйкес қарқынды жүргізіліп жатыр.
Жаңа спорт нысаны — қала халқы үшін аса қажетті әлеуметтік инфрақұрылымдық жобалардың бірі. 250 орынға арналған бұл кешен екі қабаттан тұрады және спортпен жүйелі түрде айналысуға мүмкіндік беретін кең әрі заманауи залдармен жабдықталады. Жобаға сәйкес, нысанның ішінде көркем гимнастика залы, бокс залы, жаздық және қысқы жаттығу алаңдары, тренажер залдары, киім ауыстыратын бөлмелер, душ бөлмелері, медициналық пункт және жаттықтырушылар кабинеттері қарастырылған. Сонымен бірге, спортшыларға және көрермендерге қолайлы жағдай жасау үшін заманауи санитарлық талаптарға сай қосымша бөлмелер де орналастырылады.
Кентау қаласының әкімі Жандос Тасов құрылыс алаңына арнайы барып, жасалып жатқан жұмыстармен танысты. Әкім жауапты мердігер ұйымға құрылыс сапасын басты назарда ұстауды, материалдардың стандартқа сай болуын және барлық процестің белгіленген уақыт кестесіне сәйкес жүргізілуін тапсырды. Сонымен қатар құрылыс барысында қауіпсіздік талаптарын қатаң сақтаудың маңыздылығын атап өтті. Жандос Тасов бұл нысан қаланың спорттық инфрақұрылымын айтарлықтай жақсартатынын және жастардың бос уақытын тиімді өткізуіне мүмкіндік беретінін айтты.
Қазіргі таңда құрылыс жұмыстарының алғашқы кезеңдері — нысанның іргетасын құю және жерді нығайту жұмыстары аяқталуға жақын. Жер жұмыстары толық орындалып, бетондау процесі аяқталғаннан кейін қабырғаларды көтеру, металл конструкцияларды орнату және ішкі әрлеу жұмыстары басталмақ. Мердігер компанияның мәліметінше, құрылыс жұмыстары бекітілген жоспар бойынша жүргізіліп жатыр және жоба кестеге сай 2026 жылы толық аяқталады.
Жаңа спорт кешені салынғаннан кейін Кентау қаласының тұрғындары үшін көптеген мүмкіндіктер ашылады. Бірінші кезекте, мұнда балалар мен жасөспірімдер спорт секцияларына қатысып, кәсіби жаттықтырушылардың нұсқауымен тұрақты дайындала алады. Бұл болашақта өңірден жаңа спорт жұлдыздарының шығуына жол ашады. Сонымен қатар қала тұрғындары арасында дене белсенділігін арттыруға, аурулардың алдын алуға және әлеуметтік орта қалыптастыруға ықпал етеді.
Жобаның тағы бір маңызды артықшылығы — қаладағы спорттық инфрақұрылымды орталықтандыру. Бұрын түрлі спорт түрлерімен айналысқысы келетін жастар бірнеше бөлек нысандарға баруға мәжбүр болса, енді олардың барлығы бір жерде шоғырладырылады. Бұл — уақытты үнемдеуге, жұмыстың жүйелі жүруіне және спорттық бағыттардың дамуына оң ықпал етеді.
Қаладағы спорт саласының дамуы жалпы өңірдің әлеуметтік өміріне де әсер ететіні белгілі. Спорт нысандарының көбеюі — жастардың бос уақытын тиімді өткізуіне, олардың жарақат алудан аулақ, пайдалы ортада уақыт өткізуіне мүмкіндік береді. Сонымен қатар спорттық жарыстар, қалалық және аймақтық турнирлер өткізуге жағдай жасалып, Кентаудың спорттық беделі арта түседі.
Жаңа дене шынықтыру-сауықтыру кешенінің ашылуы қала экономикасына да оң әсер етуі мүмкін. Құрылыс жұмыстары кезеңінде жергілікті тұрғындар уақытша жұмыс орындарымен қамтылып, болашақта нысан іске қосылған кезде тұрақты жұмыс орындары ашылады. Бұл жастардың жұмыспен қамтылуына, әлеуметтік белсенділігінің артуына ықпал етеді.
Кентау қаласында соңғы жылдары әлеуметтік нысандарды салу, инфрақұрылымды жаңарту жұмыстары жүйелі түрде жүргізіліп келеді. Жолдар жөнделіп, әлеуметтік нысандардың материалдық базасы жаңартылуда, жаңа жобалар іске асуда. Дене шынықтыру-сауықтыру кешені — осы игі бастамалардың жалғасы. Бұл нысан қала өмірінің сапасын арттырып қана қоймай, болашақ ұрпақтың тәрбиесіне де оң үлес қосады.
Жалпы алғанда, жаңа спорт кешені — Кентау қаласының дамуы жолындағы маңызды қадам. Құрылыс толық аяқталған соң, бұл нысан қала тұрғындарының игілігіне қызмет етіп, өңірдегі спорт саласының жаңа деңгейге көтерілуіне негіз қалайды.