Жаздың ыстық күндері балмұздаққа деген сұраныс айтарлықтай артады. Әсіресе, жұмсақ балмұздақ — балалар мен ересектердің сүйікті тәтті тағамына айналды. Дегенмен, оның сапасы мен қауіпсіздігіне қатысты талаптар өте жоғары болуы керек, өйткені дұрыс сақталмаған немесе сапасыз балмұздақ — тағамдық улану және жұқпалы аурулардың көзі болуы мүмкін.
Шымкент қаласында жұмсақ балмұздақ өндірісі мен сатуында қатаң санитариялық талаптар қойылады. Балмұздақ арнайы фризерлерде дайындалады. Қоспалар тек жаңа қайнатылған және сапасы бақылаудағы ауыз сумен ерітілген құрғақ өнімдерден жасалуы тиіс. Мұндай тәсіл өнімнің микробиологиялық қауіпсіздігін қамтамасыз етеді.
Дайын балмұздақ бірден сатылымға ұсынылады және оның сақталуына ешқандай мүмкіндік берілмейді — қоспаларды ұзақ уақыт сақтауға тыйым салынады. Бұл өндіріс процесінде өнімнің бұзылуына жол бермейді және оның тұтынушыларға қауіпсіз жетуін қамтамасыз етеді.
Шикізат ретінде қолданылатын жұмыртқа мен сүт міндетті түрде пастерленген болуы керек. Пастеризация — бұл өнімдегі қауіпті микроорганизмдерді жоятын қауіпсіздік шарасы, ол тағамдық уланулардың алдын алады. Сонымен қатар, балмұздақ сататын орындар тек дайындалған цехтарда болуы керек, көшеде немесе ашық алаңдарда сатуға жол берілмейді.
Балмұздақ өндірісі мен сату саласында жұмыс істейтін қызметкерлер медициналық кітапшамен қамтамасыз етіліп, санитариялық киім киюі, қолдарын жиі жууы және жеке гигиена талаптарын толық орындауы міндетті. Бұл — балмұздақтың қауіпсіздігі мен сапасының кепілі.
Тұтынушыларға балмұздақ сатып аларда өнімнің сыртқы түріне, сатушының киіміне және санитарлық жағдайларға назар аударуы ұсынылады. Егер балмұздақтың түсі, иісі немесе дәмі күмәнді болса, оны жеуге болмайды.
Жазғы балмұздақ — тек дәмді ғана емес, қауіпсіз де болуы керек! Тек сапалы және санитариялық талаптарға сай өнімдер ғана қала тұрғындарының денсаулығын сақтайды.
