Бүгін – жүрекке мақтаныш ұялатқан ерекше күн. Түркістан қаласында Қазақстан Республикасы Қарулы Күштерінің қатарына 20 жас сарбазды көктемгі әскерге шығарып салу рәсімі салтанатты түрде өтті. Бұл – тек ресми шара ғана емес, бұл – елінің ертеңі үшін жауапкершілікті өз мойнына алуға бел буған жас жігіттердің батыл қадамы.
Шара Түркістан қаласындағы Жастар ресурстық орталығының алаңында ұйымдастырылып, оған Ұлттық ұланның 50 сарбазы мен ардагерлер қатысты. Салтанатты жиында ҚР Қарулы Күштерінің ардагері, облыстық кеңестің төрағасы, запастағы подполковник Бабай Алдабергенов жас сарбаздарға ақ жол тілеп, Отан алдындағы борышты абыроймен өтеудің маңызын атап өтті. Ол өз сөзінде:
«Әскер – ер азаматтың үлкен мектебі. Ел тыныштығын сақтау – әрбір қазақстандықтың қасиетті борышы. Туған жеріңнің аспаны ашық, шекарасы тыныш болуы үшін сендердей жастардың батылдығы мен патриоттығы қажет», – деп жүрекжарды тілегін білдірді.
Тарихқа көз жүгіртсек, еліміз сан түрлі сынақтар мен соқпақтардан өтті. Бірақ халқымыз ешқашан ерлік пен бірліктен айныған емес. Қазақ жастары ертеден-ақ елін, жерін қорғауға әрдайым дайын болды. Ұлы Отан соғысы жылдары, Ауғанстан майданы, қазіргі бейбіт өмірдегі әскери борыш – бәрі де нағыз ер азаматтардың елге деген адалдығының айғағы.
Бүгінгі әскер қатарына аттанған Түркістан жастары да – осы рухтың, осы ерліктің жалғасы. Олар – бейбітшілік күзетінде тұратын ұландар. Олар – болашақ офицерлер, ел қорғаны. Әрбірі ата-анасының үмітін, Тәуелсіз Қазақстанның сенімін арқалап барады.
Біздің ортақ парызымыз – осы ұландарға қолдау көрсету, жастарды отансүйгіштікке, бірлікке, елге деген сүйіспеншілікке тәрбиелеу. Түркістан – бабалар рухы тоғысқан қасиетті мекен. Бұл қалада ерлікке үндейтін тарихтың өзі сөйлеп тұр. Қожа Ахмет Ясауи кесенесі мен Түркі бабалардың аманаты бізге тек өткеннің мұрасын емес, болашақтың бағыт-бағдарын да нұсқап тұр.
Құрметті Түркістан жастары!
Бүгін Отан алдындағы борышты өтеуге бет алған қатарластарыңыз – сіздердің де жолдарыңыздың бастауына айналуы мүмкін. Әскер – тек қару ұстау емес. Ол – тәртіп, төзім, ерік-жігер мектебі. Ол – азамат болып қалыптасудың үлкен кезеңі. Өз елінің перзенті ретінде, Қазақстанның бейбіт аспанын қорғау – бұл мақтанышпен атқарылатын абыройлы міндет.
Отанға қызмет ету – әрбір жастың жүрегінде болуы тиіс. Елге деген сүйіспеншілік мектеп қабырғасынан басталып, өмір бойы жалғасатын қасиетке айналуы қажет. Патриотизм – ұрандап айту емес, нақты іспен дәлелдеу. Бұл – ата-ананы құрметтеу, туған жердің тасын қасиет тұту, ұлттық құндылықтарды бағалау, мемлекеттің заңына бағыну, өз кәсібіңді адал атқару.
Бүгінгі ұрпақ – Тәуелсіз Қазақстанның ең үлкен байлығы. Біз – бірлік пен тұрақтылықты көзінің қарашығындай сақтайтын елміз. Ендеше, ел қорғау – тек әскерде жүргендердің ғана емес, барша азаматтың ортақ борышы. Түркістан жастары – сендер руханияттың жүрегінде туып-өскен ұрпақсыңдар. Осы қасиетті мекенге лайық болыңдар!
Жастарымыз әрдайым біліммен қаруланып, заманауи технологияны меңгеріп, елге қызмет етуге ұмтылуы қажет. Сонда ғана Қазақстан әлем мойындаған қуатты мемлекетке айналады.
Осы орайда, жас сарбаздарға сәт-сапар тілейміз! Жүректеріңізде туған елге деген махаббат, көздеріңізде отансүйгіштік оты өшпесін!
Отан – сенен батырлық күтеді! Түркістан – сенің тірегің! Қазақстан – сенің мәңгілік мекенің!
