Түркістан қаласында жастар арасында құқықбұзушылықтың алдын алу және қоғамдық тәртіпті сақтау мақсатында полиция қызметкерлерімен бірлескен кезекті рейдтік шара ұйымдастырылды.
Іс-шараны Түркістан қалалық Жастар ресурстық орталығы мен жергілікті полиция бөлімінің ювеналды полиция тобы бірлесе өткізіп, оның негізгі мақсаты – жасөспірімдер арасындағы құқықбұзушылықтың алдын алу, тәртіп пен жауапкершілікке баулу, сондай-ақ түнгі уақытта кәмелетке толмағандардың заңды өкілінсіз жүру фактілерінің жолын кесу болды.
Рейд барысында мамандар мен тәртіп сақшылары қоғамдық орындарды, ойын-сауық мекемелерін, саябақтар мен тұрғын үй аулаларын аралап, түсіндіру жұмыстарын жүргізді. Тексеру кезінде түнгі уақытта ата-анасының немесе қамқоршысының қатысуынсыз жүрген бірнеше жасөспірім анықталып, олардың ата-аналарына түсіндірме берілді. Сонымен қатар, мұндай жағдайдың заңға қайшы екені және ата-аналардың жауапкершілігі туралы ескертілді.
Жастар ресурстық орталығының өкілдері рейд барысында құқықтық мәдениетті қалыптастырудың маңыздылығына тоқталып, әрбір жас азаматтың өз іс-әрекетіне жауапкершілікпен қарауы қажет екенін атап өтті. Орталық мамандары мен полицейлер бірлесіп, кәмелетке толмағандарға құқықтық кеңес беріп, олардың құқықтары мен міндеттері жөнінде ақпараттық парақшалар таратты.
Іс-шара барысында жастарға арнап профилактикалық әңгімелер өткізілді. Әсіресе түнгі уақытта көшеде жүрудің қауіптілігі, құқық бұзушылықтың салдары және қоғамдық тәртіпті бұзудың жауапкершілігі түсіндірілді. Мамандар мұндай шаралар тек жазалау емес, керісінше, алдын алу және жастарды дұрыс жолға бағыттау мақсатында ұйымдастырылатынын айтты.
Полиция қызметкерлерінің айтуынша, мұндай рейдтер тұрақты түрде өткізіледі және олардың нәтижесінде құқық бұзушылық фактілері едәуір азайып келеді. Тәртіп сақшылары ата-аналарды өз балаларына көбірек көңіл бөліп, бос уақытын тиімді әрі қауіпсіз өткізуге жағдай жасауға шақырды.
Жастар ресурстық орталығының мамандары да өз тарапынан профилактикалық жұмыстарды жалғастыра беретінін және білім беру ұйымдарында, колледждер мен жоғары оқу орындарында құқықтық сауаттылық тақырыбында кездесулер өткізуді жоспарлап отырғандарын жеткізді.
Бұл рейдтік іс-шара – жасөспірімдердің заңға деген құрметін қалыптастыруға, олардың қоғамдағы тәртіп пен жауапкершіліктің маңызын түсінуіне бағытталған кешенді жұмыстардың бір бөлігі болып табылады. Осындай іс-шаралар арқылы жастар арасында құқықтық мәдениетті нығайту және қауіпсіз орта құру көзделіп отыр.