Қаратау ауданының Төтенше жағдайлар басқармасы аймақтағы соңғы сейсмикалық оқиғаларға байланысты қоғамдық қауіпсіздікті қамтамасыз ету және тұрғындар, әсіресе жастар арасында төтенше жағдайларға дайындық деңгейін арттыру мақсатында бірқатар іс-шараларды тұрақты түрде ұйымдастыруда. Соңғы осындай шара ретінде Шымкент аграрлық-техникалық колледжінде «Жер сілкінісі кезіндегі іс-қимылдар» тақырыбында арнайы сабақ өткізілді.
Аталған сабақтың басты мақсаты – студенттерге табиғи апаттардың ішінде ең қауіптісі саналған жер сілкінісі кезінде өзін-өзі қорғау, дұрыс әрекет ету ережелерімен таныстыру, сондай-ақ эвакуация барысында қауіпсіздікті сақтау және алғашқы медициналық көмек көрсету дағдыларын қалыптастыру болып табылады. Бұл білім студенттердің жеке қауіпсіздік мәдениетін арттырып, төтенше жағдайларда жан-жақты дайын болуына ықпал етеді.
Сабақ барысында Қаратау ауданы Төтенше жағдайлар басқармасының мамандары студенттерге сейсмикалық қауіпсіздік қағидаларын түсіндіріп, жер сілкінісі кезінде паникаға бой алдырмау, қауіпсіз жерлерді анықтау және тез әрі дұрыс эвакуациялану әдістерін нақты мысалдармен көрсетті. Сонымен қатар, алғашқы көмек көрсету техникасы бойынша қысқаша теориялық түсінік беріліп, практикалық кеңестер ұсынылды.
Студенттермен өткізілген осындай сабақтар олардың төтенше жағдайларға қатысты сауаттылығын арттыруға, қоғамдық қауіпсіздік мәдениетін қалыптастыруға және өздерінің болашақ мамандықтарында қауіпсіздік талаптарын қатаң сақтауға септігін тигізеді. Сонымен қатар, бұл шаралар колледж оқытушылары мен қызметкерлерінің де төтенше жағдайларға дайындық деңгейін жоғарылатуға бағытталған.
Қаратау ауданы Төтенше жағдайлар басқармасы аталған бағыттағы жұмыстарды алдағы уақытта да жүйелі түрде жалғастыруды жоспарлап отыр. Бұл — тұрғындардың қауіпсіздігін қамтамасыз ету, төтенше жағдайлардың алдын алу және олардың салдарын төмендету үшін маңызды шаралардың бірі.