Кентау қаласында кәсіпкерлік саласын дамыту, бизнес өкілдерінің ұсыныс-тілектерін тыңдау және өзекті мәселелерді жүйелі түрде шешу мақсатында кеңейтілген жиын өтті. Жиınды қала әкімдігі ұйымдастырып, оған қала әкімі Жандос Тасов, қала прокуратурасы, “Атамекен” ұлттық кәсіпкерлер палатасының аймақтық филиалының өкілдері, ауылдық округ әкімдері, бөлім және мекеме басшылары, сондай-ақ шағын, орта және ірі бизнес субъектілерінің өкілдері қатысты.
Кездесудің негізгі мақсаты – кәсіпкерлер мен жергілікті мемлекеттік органдар арасында ашық диалог орнатып, бизнестің дамуына кедергі келтіріп отырған мәселелерді талқылау, олардың шешу жолдарын бірлесіп қарастыру. Күн тәртібінде бірнеше негізгі бағыт көтерілді: инфрақұрылыммен қамту, жер телімдерін рәсімдеу, рұқсат құжаттарының қолжетімділігі, құқықтық мәселелер, мемлекеттік қолдау тетіктері және кәсіпкерлердің жайлы жұмыс істеуіне жағдай жасау.
Алғашқы болып сөз алған қала әкімі Жандос Тасов кәсіпкерлік – қаланың экономикалық дамуы мен әлеуметтік тұрақтылығының басты тіректерінің бірі екенін атап өтті. Оның айтуынша, қалада бизнес жүргізуге мүмкіндік көп болғанымен, кәсіпкерлердің шешімін күткен мәселелері де бар. Сол себепті мұндай форматтағы диалогтық алаңдар енді тұрақты түрде өткізілмек.
Кәсіпкерлер тарапынан инфрақұрылым мәселесі жиі көтерілді. Әсіресе өндірістік аймақтарда электр қуатының жетіспеушілігі, су жүйелеріне қосылу, жол сапасы және инженерлік желілердің тозуы туралы ұсыныстар айтылды. Жер телімдерін рәсімдеу мен мақсатты пайдалануды өзгерту кезінде туындайтын құжаттық кідірістер де назарға ілікті.
Бизнес өкілдері рұқсат беру процестерінің ұзақтығы, сансыз тексерістер, кейбір бақылаушы органдар тарапынан талаптардың әркелкі қойылуы кәсіпкерлерге қосымша жүктеме болатынын жеткізді. Сонымен қатар мемлекет тарапынан ұсынылатын жеңілдетілген несиелерге, гранттарға және кәсіпкерлікті дамытуға арналған бағдарламаларға қол жеткізуді жеңілдету жөнінде ұсыныстар берілді.
Жиында қала прокуратурасы өкілдері де сөз алып, кәсіпкерлердің құқықтарын қорғау – прокуратураның басты міндеттерінің бірі екенін атап өтті. Олар заңсыз тексерістердің алдын алу, бизнеске қысым көрсетілмеуі, мемлекеттік органдардың кәсіпкерлермен жұмыс барысындағы жауапкершілігі туралы нақты түсіндірмелер жасады. Кәсіп иелері құқықтық көмек алу, шағым түсіру және даулы жағдайларды шешу тәртібі туралы мәлімет алды.
«Атамекен» кәсіпкерлер палатасының өкілдері кәсіпкерлікті қолдау бағытында көрсетілетін қызметтерді таныстырып, бизнес-жобалар әзірлеу, қаржыландыруға өтініш беру, оқыту курстары, консалтингтік көмек сияқты мүмкіндіктерді кеңінен түсіндірді. Палата қала кәсіпкерлерін қолдауға әрқашан дайын екенін жеткізді.
Кездесу барысында кәсіпкерлер нақты мысалдар келтіре отырып, өндірістік нысандар салу, жұмыс орындарын көбейту, инвестиция тарту жөнінде жоспарларымен бөлісті. Олар әкімдік пен тиісті органдар тарапынан жедел қолдау көрсетілсе, қаланың экономикалық әлеуеті айтарлықтай өсетінін айтты.
Жиын соңында қала әкімі барлық айтылған ұсыныстар мен көтерілген мәселелерді мұқият тыңдап, жауапты бөлім басшыларына нақты тапсырмалар жүктеді. Әр мәселенің шешілу мерзімі белгіленіп, бақылауға алынатыны атап өтілді. Сондай-ақ Жандос Тасов кәсіпкерлермен кездесулер алдағы уақытта да тұрақты түрде жалғасатынын, қаладағы кәсіпкерлік климатты жақсарту бағытындағы жұмыстар жүйелі түрде жүргізілетінін жеткізді.
Қала әкімі: «Бизнес – экономиканың қозғаушы күші. Әр кәсіпкердің пікірі біз үшін маңызды. Біз сіздермен бірге жұмысты жақсартуға, мәселелерді шешуге дайынбыз. Ең бастысы – ашықтық пен өзара сенім», – деп қорытындылады.
Жиынға қатысушылар мұндай еркін форматтағы диалогтық алаңның кәсіпкерлерге үлкен қолдау екенін айтып, әкімдікке алғыстарын білдірді. Кездесу өзара түсіністік пен бірлескен жұмыстың жаңа кезеңін бастап берді.