Түркістан қаласындағы Ш.Ниязов атындағы жалпы орта мектептің кітапханасында «Еңбек бәрін жеңбек» атты тақырыптық кітап көрмесі ұйымдастырылды. Шараның негізгі мақсаты – оқушыларды еңбексүйгіштікке, жауапкершілікке және мақсатқа жету жолында табандылық танытуға тәрбиелеу, сондай-ақ еңбек құндылығын дәріптеу болды.
Көрме барысында оқушыларға еңбектің адам өміріндегі маңызы, табыс пен жетістікке жетудің негізгі кілті – тынымсыз еңбек екені түсіндірілді. Кітапхана қызметкерлері мен ұстаздар оқушыларға танымдық бағыттағы еңбектерді, ұлы тұлғалардың өмір жолын және еңбектің арқасында табысқа жеткен тұлғалар туралы әдебиеттерді таныстырды.
Көрмеде қазақ және әлем әдебиетінің классикалық туындылары, еңбек тақырыбындағы көркем шығармалар мен өмірбаяндық кітаптар қойылды. Олардың қатарында Ахмет Байтұрсынұлының, Ыбырай Алтынсариннің, Мұхтар Әуезовтің, Шерхан Мұртазаның еңбектерімен қатар, еңбек адамын дәріптейтін заманауи авторлардың кітаптары да көпшіліктің назарына ұсынылды.
Мектеп оқушылары ерекше қызығушылықпен кітаптарды қарап, еңбектің адам өміріндегі орны туралы пікір алмасты. Ұйымдастырушылардың айтуынша, мұндай іс-шаралар жастардың кітапқа деген қызығушылығын арттырып қана қоймай, олардың бойында еңбекке деген құрмет сезімін оятады.
– Еңбек – адамның рухани және материалдық дамуының негізі. Еңбек еткен адам өмірдің мәнін түсінеді, өз күшіне сенуді үйренеді. Сондықтан жас ұрпақтың бойына еңбексүйгіштік пен табандылық қасиеттерін сіңіру – ұстаздар мен ата-аналардың басты міндеті, – деді мектеп кітапханашысы іс-шара барысында.
Көрменің тағы бір ерекшелігі – оқушылардың өз шығармашылығынан құралған бұрыштың ұйымдастырылуы болды. Мұнда олар суреттер, эссе және еңбек тақырыбындағы ойтолғауларын ұсынды. Бұл бөлімде балалардың өз қолымен жасаған бұйымдары мен қолөнер туындылары да орын алды.
Мектептің тәрбие ісі жөніндегі орынбасары өз сөзінде:
– Бүгінгі жас буын – ертеңгі елдің тірегі. Ал елдің ертеңі еңбексүйгіш, білімді және мақсатшыл жастардың қолында. Еңбекқор адам ешқашан жолда қалмайды. Сондықтан әрбір оқушы өз өмірінде үлкен жетістікке жету үшін ең алдымен еңбекке сүйеніп, ізденуден жалықпауы керек, – деді.
Көрме соңында оқушылар арасында «Еңбек – адам өмірінің шамшырағы» атты шағын пікірталас ұйымдастырылды. Қатысушылар еңбек тақырыбына арналған мақал-мәтелдер айтып, өз өмірлерінен мысал келтірді. Мұндай сұхбаттар олардың ой-өрісін кеңейтіп, еңбектің мәнін терең түсінуге ықпал етті.
Іс-шара соңында кітапхана қызметкерлері барша қатысушыларды білім мен еңбекті серік етіп, әр күнін пайдалы іспен өткізуге шақырды. «Бүгінгі жас ұрпақтың болашағы – олардың еңбегі мен талпынысына байланысты. Сол себепті әр оқушы өз мүмкіндігін біліммен ұштастырып, еңбектің қадірін түсіне білсе, еліміздің ертеңі жарқын болмақ», – деген түйінмен кездесу аяқталды.