Елімізде шағын және орта бизнесті дамыту – экономикалық өсудің басты басымдығы болып саналады. «Әділетті Қазақстан» тұжырымдамасы аясында кәсіпкерлікті қолдау шаралары күшейіп, бизнес жүргізуге қолайлы жағдай жасалуда. Бұл оң өзгерістер жалпы республикалық көрсеткіштерден бөлек, өңірлердің, соның ішінде Ордабасы ауданының әлеуметтік-экономикалық дамуына да тікелей әсер етуде.
Ордабасы ауданы – Түркістан облысының дамып келе жатқан өңірлерінің бірі. Ауданда шағын және орта бизнес белсенді дамып келеді, жаңа жұмыс орындары ашылып, жергілікті экономика нығайып отыр. Кәсіпкерлікті қолдау мен өнім өндірісін арттыру аудан тұрғындары үшін маңызды мәселе болып табылады. 2025 жылы ШОБ субъектілері шығарған өнім көлемі айтарлықтай өсті, бұл экономикалық тұрақтылық пен дамуды көрсетеді. Аудан кәсіпкерлері мен тұрғындары үшін 2026 жылдан бастап енгізілетін жаңа салықтық жеңілдіктер ерекше мәнге ие.
Ордабасы ауданы кәсіпкерлері шағын және орта бизнесті кеңінен дамытып келеді. Жаңа енгізілетін жеңілдіктер мен салықтық реформалар оларға қосымша стимул болып, бизнесті кеңейтуге, жаңа нарық сегменттерін ашуға және экономикалық белсенділікті арттыруға мүмкіндік береді. Бұл өзгерістер аудан кәсіпкерлері үшін тиімді әрі қолжетімді құрал ретінде қарастырылып отыр.
ҚР Ұлттық экономика вице-министрі Ерлан Сағынаевтың мәліметінше, 2025 жылдың алғашқы жартыжылдығында ШОБ-тың жалпы ішкі өнімдегі үлесі 39,8%-ға жеткен. Бұл – кәсіпкерліктің белсенді дамып жатқанын және экономиканың әртараптанғанын көрсетеді. Республика бойынша 2025 жылдың екінші тоқсанында жұмыспен қамтылғандар саны 3,9%-ға өсіп, 4,4 миллион адамға жеткен. Ал тіркелген ШОБ субъектілерінің 91,2%-ы белсенді жұмыс істеп отырғаны да сектордың тұрақтылығын білдіреді.
2025 жылдың алғашқы жартыжылдығында ШОБ субъектілері шығарған өнім көлемі 25%-ға артып, 42,7 трлн теңгені құрады. Өнім көлемінің артуына бес негізгі сала үлес қосқан: сауда, өнеркәсіп және өңдеу секторлары, құрылыс, көлік және қоймалау, ауыл, орман және балық шаруашылығы. Бұл бағыттар Ордабасы ауданы үшін де өзекті. Ауданда шағын дүкендер, сервистік қызмет көрсетушілер, агрошаруашылықтар, шағын өндіріс орындары мен құрылыс компаниялары белсенді жұмыс істейді.
Ұлттық экономика министрлігі биыл ЕҚДБ-мен бірлесіп «Орта кәсіпорындардың инвестициялық тартымдылығын арттыру» бағдарламасын іске асыруда. Бағдарлама аясында кәсіпорындардың өндіріс көлемін 2–3 есеге арттыруға мүмкіндік беретін жеке жоспарлар әзірленеді. Бұл Ордабасы ауданындағы орта кәсіпорындардың бәсекеге қабілеттілігін арттырып, жаңа өндіріс бағыттарын ашуға жағдай жасайды.
Орта бизнес негізінен өңдеу өнеркәсібінде шоғырланған және ШОБ өнімінің шамамен 12%-ын құрайды. Бұл салада өсу әлеуеті жоғары, өйткені көп кәсіпорын өндірістік қуаттарын толық пайдаланбай отыр. Сондықтан кеңеюге, жаңа технологиялар енгізуге және экспортты ұлғайтуға мүмкіндік бар. Ордабасы ауданында да ауыл шаруашылығы өнімдерін өңдеу, сақтау, тасымалдау және шағын өндіріс бағыттары бойынша жаңа жобаларды іске асыруға мүмкіндік мол.
Кәсіпкерлердің мәселелерін жедел шешу үшін арнайы сарапшылық топ құрылды. Топ мемлекеттік қолдау тетіктерінің тиімділігін талдап, бизнестегі кедергілерді анықтап, оларды жоюға көмектеседі. Мұндай қолдау әсіресе өңірлер үшін маңызды.
Ордабасы ауданы кәсіпкерлері үшін бұл көрсеткіштер – елдегі реформалардың нақты көрінісі. ШОБ секторының тұрақты дамуы жаңа жұмыс орындарының ашылуына, тұрғындардың табысының артуына және жергілікті экономиканың күшеюіне жол ашады. Мемлекеттің «Әділетті Қазақстан» идеясын жүзеге асырудағы басты мақсаты – бизнеске тең мүмкіндік беру, ашықтықты қамтамасыз ету және кәсіпкерлік климатын жақсарту.
Алдағы кезеңде Ордабасы ауданында кәсіпкерлік жөніндегі консультациялар, түсіндіру кездесулері және жаңа бағдарламалар туралы ақпараттық жұмыстар жалғасады. Әрбір кәсіпкер мемлекеттік қолдау құралдарын тиімді пайдаланып, өндіріс көлемін ұлғайтуға мүмкіндік алады.
