Созақ ауданында әлеуметтік инфрақұрылымды дамыту, спорт және мәдениет саласындағы жобаларды іске асыру бағытында ауқымды жұмыстар жалғасуда. Аудан әкімі Мұхит Тұрысбековтің бастамасымен жүзеге асырылып жатқан шаралар тұрғындардың өмір сүру сапасын арттыруға, бос уақытын тиімді өткізуге және ауданның туристік әлеуетін дамытуға бағытталған.
Ауданның мәдени өмірін жандандыру мақсатында жаңа жобалар қолға алынуда. Аудан орталығындағы «Жастар саябағында» жыл соңына дейін Арбат пайдалануға беріледі. Жоба жастардың бос уақытын тиімді өткізуіне жаңа мүмкіндік беріп қана қоймай, қала мәдениетін дамытуға тың серпін береді. Сонымен қатар, биыл 9 елді мекендегі мәдениет үйлері күрделі жөндеуден өтті, ал жаңа саябақтар мен демалыс орындары кезең-кезеңімен қайта жаңғыртылуда. Аудандық кітапхананың жаңа ғимаратының құрылыс жұмыстары да биыл аяқталуға жақын. Мұндай нысандар тұрғындарға сапалы мәдени қызметтер ұсынумен қатар, жергілікті өнер мен шығармашылық дамуына жағдай жасайды.
Спорт инфрақұрылымын жаңғырту бойынша да нақты нәтижелер бар. Жақында ауданда 200 орындық жаңа спорттық-сауықтыру кешені пайдалануға берілді. Оның ішінде заманауи бассейн, футбол, волейбол, баскетбол, бокс, күрес және жаттығу залдары бар. Спорт кешені аудан тұрғындарының дене шынықтыру деңгейін көтеруге, салауатты өмір салтын қалыптастыруға маңызды үлес қосады. Сонымен қатар, Қозмолдақ ауылында жабық футбол алаңы ашылды. Шу, Тасты, Жуантөбе, Жартытөбе және Құмкент ауылдарында спорттық инфрақұрылымды дамыту бойынша құрылыс жұмыстары жүргізілуде. Аудан орталығындағы «Достар» стадионы жаңғыртылды, ал Созақ ауылында спорттық-сауықтыру кешені бой көтеруде. Ауылдық жерлерде жаңа кіші футбол алаңдары, балалар ойын және шынығу алаңдары ашылып, жасөспірімдер мен балалардың спортқа қызығушылығы арттырылуда.
Жол және тұрғын үй инфрақұрылымын жаңғырту жұмыстары да ауданның әлеуметтік дамуына ықпал етуде. 2024 және 2025 жылдары ауданда 92 пәтерлі жаңа тұрғын үй пайдалануға берілмек. Биыл әлеуметтік осал топтағы азаматтарға арналған екі қабатты жаңа үйлердің құрылысы аяқталды, ал апатты деп танылған тұрғын үйлердің орнына «Жаңғырту» бағдарламасы аясында салынып жатқан 16 пәтерлі екі қабатты үй жыл соңына дейін пайдалануға беріледі. Барлық үйлер заманауи талаптарға сай салынған, ішкі әрлеу жұмыстары мен инженерлік жүйелері толық жүргізілген. Аталған нысандар тұрғындардың жайлы өмір сүруіне, отбасының әл-ауқатын арттыруға мүмкіндік береді.
Аудан әкімінің айтуынша, мәдениет, спорт және инфрақұрылымды дамыту бағытындағы жұмыстар халықтың рухани дамуына, денсаулығын жақсартуға және әлеуметтік белсенділігін арттыруға бағытталған. «Жол, ауызсу, спорт, тұрғын үй және мәдениет саласындағы серпін – халық игілігіне қызмет етеді», – деді Мұхит Тұрысбеков. Сондай-ақ, аудандық бюджеттен бөлінген қаржы көлемінің артқаны жол құрылысын, ауызсу желілерін және коммуналдық қызметтерді жаңартуға мүмкіндік беріп отыр. Ауылішілік көшелерде асфальт төсеу және қиыршық тас салу жұмыстары жүргізіліп, тұрғындардың күнделікті қатынасын жеңілдету мақсатында жаңа жобалар қолға алынуда.
Сонымен қатар, аудандық деңгейде жүзеге асырылып жатқан жобалар жергілікті туристік әлеуетті арттыруға да бағытталған. Ауылдық жерлердегі тарихи және мәдени мұра объектілері, жаңа саябақтар мен демалыс орындары, спорт кешендері мен балалар алаңдары ауданды ішкі туризм үшін тартымды етеді. Жаңа инфрақұрылымдық жобалар туристерді тарту арқылы жергілікті кәсіпкерлікті дамытуға, әлеуметтік-экономикалық жағдайды жақсартуға үлес қосады.
Осылайша, Созақ ауданында мәдениет, спорт және туристік инфрақұрылымды жаңғырту бойынша жүйелі жұмыстар жүргізіліп, тұрғындардың өмір сапасын арттыруға, дене шынықтыру мен салауатты өмір салтын насихаттауға және ауданның туристік әлеуетін дамытуға бағытталған нақты қадамдар жүзеге асырылуда. Алдағы уақытта да бұл бағыттағы жобалар жалғасып, ауданның әлеуметтік-экономикалық дамуына елеулі үлес қосады.