Сауран ауданы, Оранғай ауылдық округінде қуаты 300 МВт болатын ірі күн электр станциясының құрылысы ресми түрде басталып, уақыт капсуласын салу рәсімі өткізілді. Бұл жоба өңірде жаңартылатын энергия көздерін дамытуға бағытталған ең маңызды бастамалардың бірі болып саналады. Жобаның іске асуы аймақтың энергетикалық әлеуетін арттыруға, жасыл энергетика үлесін ұлғайтуға және жаңа жұмыс орындарын ашуға мүмкіндік береді.
Салтанатты рәсімге Түркістан облысының әкімі Нұралхан Көшеров, «Самұрық-Қазына» ұлттық әл-ауқат қорының басшылығы, «China Energy Group» өкілдері, сондай-ақ Қазақстандағы Қытай Халық Республикасының елшісі қатысты. Жиында сөз сөйлеген облыс әкімі Нұралхан Көшеров жобаның стратегиялық маңыздылығын атап өтті. Оның айтуынша, бұл бастама облыс экономикасының әртараптануына, инвестициялық тартымдылықтың артуына және экологиялық таза энергия өндіруге жол ашады. «Бүгін өңіріміздің ғана емес, бүкіл еліміздің энергетикалық қауіпсіздігі мен жасыл экономикаға көшу жолындағы маңызды жобалардың бірі – қуаты 300 МВт болатын күн электр станциясының іргетасын қалау рәсіміне жиналып отырмыз. Түркістан облысы ауа температурасы ең жоғары аймақтардың бірі. Сондықтан жаңартылатын энергия жобаларын дамыту, күн қуатын пайдалану – өңіріміз үшін аса тиімді әрі болашағы бар бағыт. Аталған жобаны жүзеге асыру үшін құйылатын инвестиция құны шамамен 160 миллиард теңгені құрайды. Жоба аясында 500-ге жуық жұмыс орны ашылады деп жоспарлануда», – деді әкім.
Жобаның ерекшелігі – оның экологиялық таза, тұрақты дамуға негізделген құрылымда болуы. Күн электр станциясының іске қосылуы аймақтың энергетикалық инфрақұрылымын күшейтіп қана қоймай, өңірдегі инвестициялық тартымдылықты арттыруға септігін тигізеді. Сонымен қатар, бұл бастама халықаралық серіктестіктің үлгісі ретінде бағаланып отыр. Қытай Халық Республикасының Қазақстандағы Төтенше және Өкілетті Елшісі Хань Чуньлинь жобаны Қазақстан мен Қытай арасындағы стратегиялық серіктестіктің жарқын үлгісі деп атап, жасыл энергетика саласындағы бірлескен бастамалардың маңыздылығына тоқталды.
«Самұрық-Қазына» ұлттық әл-ауқат қорының басқарма төрағасы Нұрлан Жақыпов жобаның Қазақстанның энергетикалық қауіпсіздігін нығайтуға елеулі үлес қосатынын атап өтті. Сонымен қатар «Самұрық-Энерго» АҚ басқарма төрағасы Қайрат Мақсұтов жобаның компанияның төмен көміртекті генерацияға және заманауи энергия жүйесін дамытуға кезең-кезеңмен көшу стратегиясының маңызды бөлігі екенін жеткізді. «Бұл станцияны салу – инвестициялық жоба ғана емес, сонымен қатар еліміздің ұзақ мерзімді орнықты дамуына қосқан үлесіміз», – деді Қайрат Мақсұтов.
Жобаны жүзеге асыруға атсалысқан «China Energy Engineering Overseas Investment Company» директорлар кеңесінің төрағасы Линь Сяодань жобаның техникалық, экологиялық және инвестициялық аспектілерін атап өтіп, оны сапалы әрі белгіленген мерзімде іске асыруға дайын екенін мәлімдеді. Капсуланы салу құрметі Түркістан облысының әкімі Нұралхан Көшеровке, «Самұрық-Энерго» АҚ басқарма төрағасы Қайрат Мақсұтовқа және «China Energy Engineering Overseas Investment Company» директорлар кеңесінің төрағасы Линь Сяоданьға берілді.
Қуаты 300 МВт болатын күн электр станциясының іске қосылуы өңірде жаңартылатын энергия көздерінің үлесін едәуір арттырады. Сонымен қатар, бұл жоба жергілікті және халықаралық инвестицияларды тартуға, жаңа өндіріс орындарын ашуға мүмкіндік береді, сонымен қатар аймақтың тұрақты және экологиялық қауіпсіз дамуына серпін береді. Жобаның жүзеге асуы Түркістан облысында жасыл энергетика саласын дамытудағы жаңа белесті білдіреді.
Жоба аясында келесі мүмкіндіктер қарастырылған:
-
Жергілікті тұрғындарды тұрақты жұмыс орындарымен қамтамасыз ету;
-
Аймақтың энергетикалық қауіпсіздігін күшейту;
-
Энергия өндірісінде экологиялық таза технологияларды қолдану;
-
Халықаралық инвестициялық серіктестікті дамыту;
-
Жаңартылатын энергия көздері саласында тәжірибе алмасу және инновацияларды енгізу.
Осы жобаның жүзеге асуы Қазақстанның жасыл экономикаға көшу жолында маңызды қадам болып саналады. Күн энергиясын пайдалану арқылы облыс климаттық өзгерістердің әсерін азайтуға, көміртек шығарындыларын төмендетуге мүмкіндік алады. Сонымен қатар, бұл бастама өңірдің инфрақұрылымдық әлеуетін арттырып, халыққа сапалы әрі тұрақты электр энергиясын жеткізуді қамтамасыз етеді.
Жиында жобаның техникалық, экономикалық және әлеуметтік аспектілері жан-жақты талқыланды. Қатысушылар жобаның тиімділігі мен инвестициялық тартымдылығын атап өтіп, оның Қазақстан мен халықаралық серіктестер үшін маңызды екенін айтты. Сондай-ақ, станцияның құрылысын сапалы және белгіленген мерзімде аяқтау міндеті қойылды.
Жалпы, 300 МВт қуаттағы күн электр станциясының құрылысы Түркістан облысы үшін стратегиялық маңызы бар жобалардың бірі болып есептеледі. Бұл жоба өңірдің энергетикалық қауіпсіздігін арттырып, жасыл экономикаға көшуге септігін тигізеді. Сонымен қатар, ол халықаралық серіктестік пен инвестицияларды дамытуға, жаңа жұмыс орындарын құруға және аймақ экономикасын әртараптандыруға мүмкіндік береді. Осы бастама Түркістан облысының болашағын тұрақты әрі экологиялық қауіпсіз етуге бағытталған маңызды қадам болып табылады.