Қазақстан Республикасы Конституциясының 30 жылдық мерейтойына орай Сауран ауданында салтанатты іс-шара ұйымдастырылды. Мерекелік жиынға ауданның зиялы қауымы, ардагерлер, мемлекеттік қызметкерлер мен жастар қатысты.
Аудан әкімі Мақсат Таңғатаров жиналғандарды айтулы мерекемен құттықтап, Конституцияның ел дамуындағы ерекше маңызын атап өтті. Өз сөзінде:
– Конституция — тәуелсіз еліміздің басты құндылықтарын айқындаған тарихи құжат. Ол мемлекетіміздің іргетасын бекітіп, халықтың құқықтары мен бостандықтарын қорғаудың берік кепілі болып келеді. Бүгінгі мерейлі күнде біз өткенге тағзым етіп, болашаққа нық қадам басамыз. Ел игілігі жолында аянбай еңбек етіп жүрген баршаңызға ризашылығымды білдіремін, — деді аудан әкімі.
Сонымен қатар, ол облыс әкімі Нұралхан Көшеровтің және өзінің атынан бірқатар мемлекеттік қызметшілерге алғыс хат табыс етті.
Мерекелік жиында аудандық мәслихат төрағасы Сержан Байспаев құттықтау сөз сөйлеп, халыққа адал қызмет етіп жүрген қызметкерлерді марапаттады. Сондай-ақ, облыстық мәслихат депутаты Баймахан Сүлейменов құттықтау сөз арнап, Конституция күні — ел бірлігі мен тұрақтылығының кепілі екенін ерекше атап өтті.
Салтанатты шара концерттік бағдарламаға ұласып, аудан өнерпаздары мен шығармашылық ұжымдары мерекелік ән-бигімен көпшіліктің көңілін көтерді.